Siglir tar il cuntegn
Inhalt

Svizra Airbnb dublegia giasts en Svizra aifer in onn

Airbnb, il pli grond intermediatur d'abitaziuns privatas online, crescha a moda rasanta en Svizra. Per l’emprima giada ha Airbnb publitgà cifras per la Svizra. L'onn passà han passa 300’000 giasts reservà in alloschi via Airbnb en Svizra. Quai èn quasi dubel uschè blers sco l'onn avant.

Airbnb pudess cun quest resultat esser in dals paucs purschiders da la branscha turistica en Svizra ch’ha nudà in bun svilup. Ils hotels han patì dal ferm franc ch’ha era tegnì sin distanza giasts da l’Europa. Er manaschis da bed-and-breakfast, campadis ed jugis èn stadas frequentadas marcantamain mender.

Dal product da nischa tar in trend

Hotelleriesuisse aveva titulà Airbnb avant trais onns sco «product da nischa». Da lez temp deva quai però er be radund 2’000 ospitants d’Airbnb en Svizra.

En il fratemp è il dumber d’inserats creschì enorm. Actualmain datti sur 17’000 inserats, sco Airbnb communitgescha. Per gronda part vegnan dadas a fit singulas stanzas, abitaziuns u chasas. I dettia dentant er alloschis extraordinaris sco chasas sin plantas u iglus.

Ospitant svizzer: 1 inserat privat e 40 onns

Tenor Airbnb ha l’ospitant svizzer tipic 40 onns ed ha inserà sco persuna privata. 87% dals ospitants hajan publitgà be in inserat. Sch’in purschider haja publitgà dapli ch’in inserat, lura saja quai in indizi per ina lavur professiunala, per exempel ina firma d’immobiglias.

Ils critichers d’Airbnb, cunzunt ils hoteliers svizzers, il link avra en ina nova fanestra, èn da l’avis ch’ospitants dal servetsch duain er pajar ina taxa da cura.