Siglir tar il cuntegn
Inhalt

Svizra Agroscope - schleppa per Schneider Ammann

Er il Cussegl dals chantuns crititgescha la reorganisaziun d'Agroscope, l'institut da perscrutaziun per l'agricultura, Cun 28 cunter 6 vuschs tar trais abstenziuns ha la chombra pitschna approvà ina moziun ch'oblighescha la Confederaziun da manar tals instituts.

Cusseglier federal Johann Schneider Ammann sesa en la chombra da parlament e taidla tiers.
Legenda: Johann Schneider Ammann ha udì blera critica envers ils plans da reorganisaziun. Keystone

Avant la votaziun hai dà ina discussiun ensalada. Gia l'emna passada hai dà gronda critica davart ils plans da reorganisaziun. Il Cussegl naziunal ha approvà ina moziun che pretenda in stop immediat en il cas Agroscope.

Dal «po» al «sto»

En la moziun da Géraldine Savary, PS/VD, vai en emprima lingia persuenter d'incumbensar explizitamain che la Confederaziun ha da manar instituts da perscrutaziun agriculs. Oz è la lescha d'agricultura formulada en quest punct pli luc: «La Confederaziun po manar instituts da perscrutaziun».

Il cusseglier federal Johann Schneider Ammann è stà mal davart la panna da communicaziun e la moda e maniera co las infurmaziuns dals plans anc betg madirs èn vegnids en la publicitad. Cunquai che las medias hajan survegnì ils documents haja el stuì reagir a curta vista.

La moziun approvada va uss en il Cussegl naziunal.

RR novitads 14:00