Siglir tar il cuntegn
Inhalt

Svizra Agenturas da posta duain porscher dapli service

En tut la Svizra vegnan serradas adina dapli postas, percunter datti adina dapli agenturas da posta. Quellas agenturas na porschan dentant betg adina in service cumplain. Il Cussegl naziunal vul midar quai.

Il Cussegl naziunal ha debattà davart il futur dal servetsch da la Posta.
Legenda: Il Cussegl naziunal ha debattà davart il futur dal servetsch da la Posta. Keystone

Il service da la posta vegn duvrà adina damain. La consequenza: las postas van serradas. Era sche il service da la Posta na vegn betg pli duvrà tant, datti anc adina bleras persunas ch’èn dependentas da quest servetsch.

Plitost persunas pli passiunadas profiteschian dal servetsch. Perquai saja quai impurtant ch'ina posta ni in'agentura da posta saja per almain 90% da la populaziun cuntanschibla en 20 minutas a pè ni cun il traffic public.

Tenor il cusseglier naziunal grischun Martin Candinas vegn dentant fat ora fauss il quint.

Ins duai far ora ils 90% tut tenor regiun. Ussa mettan ins tut en ina, citad e pajais, lura èsi clar che nus cuntanschain senza problem ils 90%. Perquai ch'en citad en ins bler pli spert tar ina posta.
Autur: Martin CandinasCusseglier naziunal PCD, Grischun

Tar quel quint sajan precis las regiuns quellas che perdan. Auter vesa quai il cusseglier naziunal da la PLD Thierry Burkart. El beneventass sch'i fiss uschia che mintgin, era ils abitants da las regiuns periferas, rivassan senza perder grond temp sin posta. Dentant per el na è quai betg la dretga via da far quai cun ina perscripziun.

La Posta ha empermess da tschertgar soluziuns ensemen cun las vischnancas. Bain vegnan postas serradas, dentant era agenturas avertas. Da nus dependa uss dad avair in egl, sch'i tegnan lur pled.
Autur: Thierry BurkartCusseglier Naziunal PLD Argovia

Dentant per Martin Candinas èsi cler che tut quai sto vegnir regulà. El tema che la Posta vegn en avegnir forsa perfin a serrar anc las agenturas da posta. Perquai vul el garantir in Service Public a mintgina e mintgin.

Il cussegl naziunal è suandà a Martin Candinas. El s'ha decis cun ina gronda maioritad da 172 encunter 13 vuschs e 2 abstenziuns da garantir en l'avegnir in servetsch cumplet da la Posta ch'è cuntanschibel era per abitants da regiuns periferas en maximal 20 minutas a pè ubain cul traffic public.

Dentant decis n'è anc nagut. La moziun va enavant en il Cussegl dals chantuns.

RR actualitad 11:00