Siglir tar il cuntegn

Svizra Affera Posta: Directur dal UFT avertescha

L’Uffizi federal da traffic UFT avess pudì constatar pli baud che l’AutoDaPosta SA haja retratg sur onns. Responsabels per las cugliunarias tar la Posta na saja betg Susanne Ruoff suletta, mabain l'entir cussegl d'administraziun, quai di il directur da l'uffizi federal da traffic, Peter Füglistaler.

Purtret da Peter Füglistaler.
Legenda: Tenor il directur, Peter Füglistaler, èsi privlus da dar la culpa sulettamain a la scheffa Susanne Ruoff. Keystone

Curt e concis

  • Sur plirs onns haja l'AutoDaPosta SA retratg subvenziuns da 78 milliuns betg giustifitgadas. L'uffizi federal da traffic ha fatg enconuschent quai quest'emna.
  • Il directur, Peter Füglistaler, è uss confruntà cun la dumonda, pertge che quest scandal è restà senza consequenzas.
  • En l'emissiun «Samstagsrundschau» ha Füglistaler detg cler: La responsabladad è tar la Posta, ma betg sulettamain tar la scheffa Susanna Ruoff.

L’Uffizi federal da traffic avess pudì constatar pli baud che l’AutoDaPosta SA haja retratg sur onns subvenziuns betg giustifitgadas sur totalmain 78 milliuns francs. Quai ha ditg Peter Füglistaler, il directur da l’uffizi, en la «Samstagsrundschau» da Radio SRF.

Memia bler confidenza en la Posta

Che la Posta cugliuna, quai n'avain nus simplamain betg pudì metter avant.
Autur: Peter Füglistalerdirectur uffizi federal da traffic UFT

L'uffizi haja cumenzà d’investigar il 2016 – tschintg onns suenter ch’ils emprims chantuns hajan annunzià irregularitads. Il problem dals controlladers federals saja stà, ch’els hajan gì memia bler confidenza en la Posta. Per part ha Füglistaler prendì en protecziun la scheffa da la Posta Svizra, Susanne Ruoff. L’entir cussegl d’administraziun saja responsabel, e betg la scheffa persula.

RR novitads 17:00