En l’affera Hildebrand è vegnì violà il secret bancar. La dretgira districtuala da Turitg concluda che Reto T., l’emploià ch’aveva provocà l’affera, sco er il politicher da la PPS dal chantun Turgovia ed advocat Hermann Lei èn culpants. I resta tar ils chastis cundiziunads, sco proponì da la procura publica.
- Hermann Lei è vegnì sentenzià pervi da cumplicitad da violaziun dal secret bancar e pervi da violaziun dal secret bancar empruvada. El survegn in chasti da 120 taxas per di a 340 francs cun in temp d’emprova da dus onns.
- L’absent Reto T. è vegnì sentenzià pervi da multipla violaziun dal secret bancar ed da fatschenta. El survegn in chasti da 45 taxas per di a 30 francs, medemamain cun in temp d’emprova da dus onns.
Nagins ulteriurs process en il cas Hildebrand
Ulteriurs process en l’affera Hildebrand na datti betg. La procura publica n’ha betg avert in proceder cunter Hildebrand pervi da fatschentas d’insider. Ils proceders cunter Blocher ed auters politichers en connex cun la violaziun dal secret bancar èn vegnids sistids.
Il president da la Banca naziunala svizra aveva demissiunà il schaner 2012. El aveva argumentà ch’el na sappia betg cumprovar senza dubi, che sia dunna da lez temp haja fatg las fatschentas da devisas ch’eran daventadas publicas.
RR novitads 10:00