Siglir tar il cuntegn

Header

audio
L'affera Crypto – tge dian ils politichers grischuns a Berna?
Or da Actualitad dals 12.02.2020.
laschar ir. Durada: 4 minutas 41 Secundas.
cuntegn

Affera Crypto Er ina PUK è in'opziun

Politichers dal Grischun vulan avair scleriment en l’affera Crypto SA. Betg sclaus vegn d’instradar ina PUK.

Anc saja memia baud da gia pretender consequenzas. Quai di il cusseglier dals chantuns cristiandemocratic Stefan Engler. I dovria qua anc dapli scleriment.

Nus na savain anc betg tge rolla che noss servetsch secret e las autoritads han gì. Nus stuain spetgar, enfin che nus enconuschain meglier ils fatgs.
Autur: Stefan Engler Cusseglier dals chantuns PCD

Per el è dentant cler; sche las infurmaziuns ch’èn enfin ussa enconuschentas vegnan confermadas, è quai ina greva frida per la reputaziun da la Svizra. Sch’igl avess da sa mussar ch’igl era enconuschent en Svizra tge ch’è vegni fatg, dettia quai in problem per il maletg da la neutralitad da la Svizra. I dovria perquai investigaziuns dal Cussegl federal ed era dal Parlament federal per chattar ils responsabels, di Engler.

Parlament federal sto vegnir activ

El beneventia perquai ch'il Cussegl federal ha instradà in'inquisiziun en chaussa. Quai na tanschia dentant betg. Era il Parlament federal stoppia vegnir activ ed instradar in'inquisiziun. Ils instruments sajan avant maun, quai cun la delegaziun da la cumissiun da gestiun.

Il cusseglier dals chantuns liberaldemocratic Martin Schmid vesa en emprima lingia il Cussegl federal en la responsabladad. Ins duaja ussa ina giada spetgar ils resultads da l'inquisiziun che lez haja instradà. Critic fiss per el mo, sche las autoritads statalas avessan savì da quai e n’avessan betg instradà mesiras.

Uschiglio èsi ina realitad ch’autras pussanzas èn involvidas en interpresas da la Svizra.
Autur: Martin Schmid Cusseglier dals chantuns PLD

In pau auter vesa quai il cusseglier naziunal socialdemocratic Jon Pult. I saja bun ch'il Cussegl federal haja reagì bainspert ed haja instradà in'inquisiziun. L'incumbensa dal Parlament federal saja dentant era da controllar l'executiva. Perquai saja per el cler ch'il parlament stoppia ussa vegnir activ.

Probabel è era l’instrument da la PUK il gist instrument.
Autur: Jon Pult Cusseglier naziunal PS

I sa tractia dad ina situaziun epocala per la Svizra e la credibilitad da lezza. E perquai saja giustifitgà ch’il parlament prendia enta maun tut ils instruments, cun ils quals el possia restabilir sco emprim la vardad e sco segund era la credibilitad da noss pajais.

Il donn saja dentant gia qua. Sche las infurmaziuns contstettian, muntia quai che la Svizra na saja betg stada independenta e neutrala sco quai ch'i vegnia adina ditg.

Donn per la reputaziun da la Svizra

Tant Pult sco er Engler e Schmid èn persvas che la Svizra stoppia ussa lavurar si da rudent tut quels fatgs enturn l'interpresa Crypto SA, l'influenza da servetschs secrets en Svizra e las eventualas colliaziuns tar l'administraziun federala e la politica. Mo uschia possia la Svizra puspè recuperar il respect e la confidenza da ses partenaris internaziunals.

RTR actualitad 12:00

Artitgels legids il pli savens