La delegaziun da la cumissiun da gestiun dal parlament GPDel vul intercurir l'affera Crypto enturn la firma da Zug. Quai ha ella decis oz gievgia, quai sco il president, Alfred Heer da la PPS ha ditg avant las medias.
En il center stettia la dumonda, tge che las autoritads svizras han savì.
Emprimas audiziuns duain anc vegnir fatgas l'auter emna. Emprims resultats vul la delegaziun preschentar la stad. La delegaziun pretenda tranter auter invista betg limitada en tut ils documents da l'archiv.
En discussiun stat er dad instradar ina PUK, ina cumissiun parlamentara d'inquisiziun.
«Betg ina suletta reacziun»
Ils stadis pertutgads han apparentamain betg reagì fin uss. «Nus n'avain fin oz survegnì betg ina suletta reacziun dals stadis pertutgads». Quai ha ditg il pledader dal Cussegl federal, André Simonazzi, a l'ur d'ina conferenza da medias.
Posiziun da Guy Parmelin – «Na»
Era il Cusseglier federal Guy Parmelin è vegnì confruntà cun l'affera da spiunascha. Sin la dumonda sch'el haja gì enconuschientscha da l'influenza dals sevetschs secrets americans e tudestgs sin la firma Crypto durant ses temp sco schef dal departament da defensiun, ha el respundì cun in sulet pled: «NA».
RTR novitads 14:00