Siglir tar il cuntegn
Inhalt

Svizra Affera AutoDaPosta: I dovra ina nova scua

En la gruppa d’experts ch’investighescha l’affera AutoDaPosta datti midadas. L’anteriur schef da la controlla da finanzas federala Kurt Grüter sa retira dal gremi.

Kurt Grüter.
Legenda: Kurt Grüter na vul betg periclitar ils resultats da l'expertisa e sa retira. Keystone

Suenter bain ponderar saja el sa decidì da sa retrair dal mandat, ha Grüter communitgà a l’agentura da novitads sda. Uschia veglia el garantir, ch’il giudicat da la gruppa d’experts na vegnia betg mess en dumonda pervi da discussiuns davart sia persuna.

Ils davos dis avevan tant politichers sco era la controlla da finanzas federala mess en dumonda sia independenza, ha Grüter scrit. Quel è stà fin il 2013 directur da la controlla da finanzas, e pli baud ha el gì funcziuns tar l’interpresa antecessura da La Posta, la PTT.

Spetgà nagin retard

Il president dal cussegl d’administraziun da La Posta Urs Schwaller aveva incaricà avant bun duas emnas trais experts, per intercurir ils trics da cudeschaziun da la AutoDaPosta SA. Per remplazzar Grüter vegnian els uss a tschertgar ina persuna adattada, ha ditg Schwaller sin dumonda. El na quintia betg che las investigaziuns vegnian retardadas qua tras.

RR novitads 15:00