Siglir tar il cuntegn

Header

Policist en Chasa federala a Berna.
Legenda: En Chasa federala vegn il servetsch da segirezza ussa organisà da nov (maletg da simbol). Keystone
cuntegn

Svizra Adina dapli smanatschas cunter politichers

Il clima politic vegn pli criv en Svizra: Adina pli savens datti smanatschas cunter cussegliers federals e derschaders. L'onn passà hai dà 17 giadas dapli smanatschas che anc l'onn 2012. Quai mussa ina statistica da l'Uffizi federal da polizia.

I sa tracta da cas nua che cussegliers federals, parlamentaris e derschaders fan quitads per lur segirtad. En cas extrems vegn smanatschà cun la mort. Avant tschintg onns hai anc dà 105 talas smanatschas ad onn, l’onn passà eran quai gia 1'691 cas. Quai rapporta la gasetta «Schweiz am Wochenende».

Scriver da smanatscha

En Chasa federala è il 2016 arrivà suandant scriver senza speditur: «La proxima gievgia vegn jau ad assassinar vus. Il proxim di vegn jau lura a siglientar la Chasa federala. Forsa vegn jau ad assassinar tut ils commembers dal Cussegl federal». L’uffizi federal ha silsuenter dà alarm, orientà las persunas periclitadas e ha supplementarmain ordinà mesiras da segirezza.

Motivs per quest augment

L’Uffizi federal da polizia numna dus motivs: Per l'ina saja la politica vegnida pli criva cun debattas agressivas che polariseschan gist en temp enturn las elecziuns naziunalas u era tar il tema fugitivs. Per l'autra sajan era ils politichers pli sensibilisads ed annunzian pli savens a la polizia sch'els survegnan smanatschas.

Las mesiras da segirtad en ed enturn Casa federala vegnan dentant betg adattadas. Controllas pli rigurusas datti gia dapi l’onn 2001, quai dapi l’attentat en il parlament a Zug.

RR novitads 12:00

Artitgels legids il pli savens