Siglir tar il cuntegn
Inhalt

Svizra Adina dapli novs cas dal virustgel

Il ultims mais èn ils cas da virustgel en Svizra creschids marcantamain. Dapi l'entschatta da l'onn ha l'Uffizi per la sanadad registrà 69 cas. L'entir onn 2016 èn quai stads 71 cas.

Purtret d'in uffant cun ils punctins cotschens ch'il virustgel mussa.
Legenda: Il virustgel sa derasa adina pli fitg en Svizra, ma er en l'entira Europa. Keystone

La Confederaziun aveva avertì gia il favrer d'ina derasaziun dal vidrustgel. L'Uffizi federal per la sanadad aveva danovamain cusseglià da sa laschar vaccinar, pertge er en l'Europa sa derasa il vidrustgel.

Il mars ha il center da l'Europa per prevenziun e controlla da malsognas registrà sulet en la Rumenia 3'446 cas da virustgel dapi il settember. Ils pli blers pertutgads n'èn betg stads virolads.

Scola da Savognina aveva fatg pli lungas vacanzas da Nadal

En il Grischun hai dà intgins cas da virustgel, il temp da Nadal e Bumaun, a Savognin ed a Tavau. Dapi ils 27 da schaner n’hai dentant dà nagins pli, di il medi chantunal Martin Mani. La populaziun saja da principi immunisada bain envers il virustgel, uschia che quai saja ina malsogna rara. Magari dettia quai in pèr cas da virustgel, e suenter ditg nagut. Quai saja il svilup normal da questa malsogna.

Emprima unfrenda dapi il 2009

Il favrer è l'emprima giada dapi il 2009 morta ina persuna dal virustgel. In giuvenil è mort sin la staziun intensiva pervia d'in collaps dal lom. Perquai ch'el aveva leuchemia aveva l'unfrenda fatg ina terapia che aveva flaivlentà fermamain ses sistem d'immunitad. Perquai n'haja er la virola betg gidà.

Quest cas mussia tenor la Confederaziun quant impurtant ch'i saja da sragischar il virus dal virustgel er en Svizra. Tenor studis èn almain 95% da las persunas che han virolà ina giada cunter quel immunas.Tar persunas ch'èn viroladas duas giadas crescha il schurmetg sin 98%.

Ensemen cunter il virustgel

Finamira da la Confederaziun è che almain 95% da la populaziun laschan virolar cunter il virustgel. Uschia n'avess il virustgel naginas schanzas pli da sa derasar en Svizra.

Sche 95% da la populaziun fiss virolada protegess ella uschia er quellas persunas che n'han senza savair nagina protecziun dal virus e quels che na pon betg laschar virolar per motivs medizinals.

RR novitads 14:00