Siglir tar il cuntegn

Header

Navigaziun

Chauma sin in plazzal da bajegiar, placats e da dalunsch lavurants.
Legenda: Il sectur da construcziun è adina puspè tema tar dumping da pajas – qua ha envidà il sindicat Unia sin in plazzal da fabrica contestà en la Romandie. Keystone
cuntegn

Svizra Adina dapli interpresas svizras van suten cun las pajas

Ina controlla dal secretariat statal per economia SECO ha mussà, che 12% da las interpresas svizras senza contract collectiv fan dumping da pajas. Quai ha communitgà il SECO.

L’on passà ha il SECO controllà 42’000 interpresas e 164’000 persunas per guardar, sch’ellas sa tegnan vid las cundiziuns da lavur e paja. Quai è vegnì fatg en il rom da las mesiras flancantas per la circulaziun libra da persunas.

Interpresas senza contract collectiv en la critica

La controlla ha mussà ch’i dat vi e pli interpresas, che na sa tegnan betg vi da las cundiziuns prescrittas – quai surtut tar interpresas, che n’èn betg liadas ad in contract collectiv (GAV). Tar quellas interpresas èn vegnidas fatgas il 2015 e 2016 en tut 20'714 controllas. Quellas controllas han mussà 2’159 cas da dumping da paja, tge che correspunda ad ina quota da 12%. Ils onns 2013/2014 era la quota anc tar 9%.

Cifra da controllas vegn augmentada vinavant

En il cumparegl cun l'onn passà è il dumber da las controllas bain chalà per 6%, il nivel da controlla saja dentant stà in dals pli auts dapi il 2008, communitgescha il Seco.

Il Cussegl federal vul, che las mesiras flancantas per cundiziuns da lavur e da paja vegnan tegnidas èn meglier. Perquai vegnan augmentadas las controllas per 30% sin 35’000 controllas l’onn. Ils sindicats avevan schizunt dumandà in augment sin 50’000 controllas.

RR novitads 15:00