Siglir tar il cuntegn

Header

Navigaziun

Dus aviuns da la Patrouille Suisse dal tip «Tiger» avevan strivla in l'auter durant in sgol da trenament (maletg simbolic).
Legenda: Dus aviuns da la Patrouille Suisse dal tip «Tiger» avevan strivla in l'auter durant in sgol da trenament (maletg simbolic). Keystone
cuntegn

Svizra Accident Patrouille Suisse: 2 examinaziuns

Duas examinaziuns duain sclerir pertge che l'aviun da cumbat da la Patrouille Suisse è crudà giu en l'Ollanda. Ina da quellas maina la giustia militara svizra. L'autra è in’examinaziun davart la controlla dal traffic aviatic che las autoritads ollandaisas fan.

Ils Svizzers èn arrivads al lieu da l’accident il venderdi. Las autoritads d’examinaziun ollandaisas han era gia cumenzà a segirar ils mussaments. Entant lavuran omadus teams ensemen. Tenor l'aviatica militara svizra cumpiglia la delegaziun svizra 13 persunas. A quella appartegnan dus inquisiturs da la giustia militara e duas persuna d'in Care Team. Lez duain s'occupar dals pilots e lur parentella.

Durant il sgol da trenament da la Patrouille Suisse avevan dus aviuns strivla in l’auter. In dals jets era crudà e sa tschentà en in lajet. Il pilot aveva pudì sa catapultar ord l’aviun. Tenor indicaziuns dal DDPS ha el ina ruttadira vid in pe, plirs tagls levs e contusiuns. Il segund pilot aveva atterrà a moda controllada ses aviun donnegià.

RR novitads 20:00