Siglir tar il cuntegn

Header

video
Las mesiras restan, quarantina ed isolaziun vegnan reducidas
Or da Telesguard dals 12.01.2022.
laschar ir. Durada: 2 minutas 38 Secundas.
cuntegn

Dapi ils 13 da schaner Cussegl federal reducescha isolaziun e quarantina sin 5 dis

Il Cussegl federal ha decis da reducir a partir da damaun il temp dad isolaziun e quarantina sin 5 dis. En pli ha el tramess differentas mesiras en consultaziun.

  • Isolaziun e quarantina vegnan reducidas sin 5 dis.
  • Differentas mesiras vegnan tramessas en consultaziun als chantuns.
  • Tranter auter duain las mesiras actualas vegnir prolungadas fin la fin da mars.
  • Valaivladad dal certificat duai vegnir reducida sin 270 dis.

En vista a la situaziun epidemiologica vul il Cussegl federal prolungar las mesiras actualas, ch’èn vegnidas prendidas mez december, fin la fin da mars. Plinavant duain certificats be pli valair 270 dis.

audio
Malgrà cifras autas da corona damain quarantina ed isolaziun, decida il Cussegl federal
ord Actualitad dals 12.01.2022.
laschar ir. Durada: 6 minutas.

Isolaziun e quarantina

Avrir la box Serrar la box

Il Cussegl federal scursanescha tant il temp da la quarantina sco er il temp da l’isolaziun. Enstagl sco fin uss 10 dis vala davent da gievgia ils 13 da schaner ina durada da 5 dis.

Vitiers vala la quarantina da nov sulettamain per persunas – che vivan cun ina persuna testada positiv en la medema chasada, u ch’avevan cun ina persuna positiva sumegliant contact regular e stretg. Betg resguardar quai ston persunas che han survegnì lur davosa dosa da vaccin avant main che quatter mais, u ch’èn guaridas avant pli pauc che quatter mais.

Per persunas en isolaziun, vul dir persunas ch'èn testadas positiv sin Covid-19, vala vinavant, ch’ellas ston esser stadas las davosas 48 uras senza sintoms per pudair bandunar l’isolaziun.

Per il Cussegl federal resta la situaziun epidemiologica vinavant tendida. Malgrà ch’il dumber d’ospitalisaziuns è sa reducì l’ultim temp, è il dumber d’infecziuns creschì rasant. Persunas guaridas e vaccinadas ston suenter in’infecziun cun la varianta «omicron» dentant betg pli vegnir ospitalisadas uschè bler, sco tar la varianta «delta». Il dumber da persunas ospitalisadas pervia da corona è sa reducì.

video
Berset: «Nus vegnin tuts a vegnir en contact cun il virus»
Or da News-Clip dals 12.01.2022.
laschar ir. Durada: 1 minuta 17 Secundas.

Squitsch sin ils ospitals vegn a crescher

Malgrà che la varianta omicron è tenor il Cussegl federal pli pauc privlusa, è in’augment da las ospitalisaziuns bain pussibel. Il squitsch sin ils ospitals vegnia a crescher, di il Cussegl federal – er persunas che n’èn betg ospitalisadas pervia da corona, ston vegnir isoladas. Er ston ils ospitals quintar che persunal croda or.

Prolungar mesiras actualas

En vista al squitsch duain las mesiras actualas - tranter auter la regla da 2G, las restricziuns tar inscunters privats, l'obligatori da homeoffice - vegnir prolungadas fin ils 31 da mars. La consultaziun cuzza fin ils 17 da schaner.

Sche la situaziun en ils ospitals sa pegiurescha, po il Cussegl federal independent da la consultaziun, decider ulteriuras mesiras.

video
Berset: «I na dovra naginas mesiras novas»
Or da News-Clip dals 12.01.2022.
laschar ir. Durada: 29 Secundas.

Consultaziun areguard certificats

Il Cussegl federal vul en pli reducir la valaivladad da tut ils certificats da vaccinaziun, da 365 dis sin 270 dis. Quai per ch’ils certificats restian er vinavant valaivels en l’Uniun europeica. Analog duai er il certificat per guarids vegnir reducì sin 270 dis. La midada duai ir il 1. da favrer en vigur.

Ulteriuras dumondas

En pli vul il Cussegl federal savair dals chantuns lur posiziun areguard in scumond d'instrucziun en preschientscha sin nivel terziar, sco per exempel tar scol'autas ed universitads – e tge ch'ils chantuns manegian da restricziuns tar occurrenzas grondas.

Reacziuns sin la decisiun:

audio
Per tadlar curt e cumpact
ord RTR Audio dals 13.01.2022.
laschar ir. Durada: 1 minuta 13 Secundas.

RTR novitads 14:00

Artitgels legids il pli savens