Siglir tar il cuntegn

Svizra A la fradaglia pudess succeder ina midada andetga

En la notg da glindesdi sin mardi èn en bleras parts da la Svizra vegnidas mesiradas las pli bassas temperaturas da questa stagiun. En il decurs dal di stoppian ins dentant quintar cun in augment da temperatura andetg.

Cuntrada da naiv.
Legenda: Anc è l'enviern betg passà: la notg sin mardi han ins mesirà temperaturas sut nulla en grondas parts da la Svizra. Keystone

En la notg da glindesdi sin mardi han ins en bleras parts da la Svizra mesirà temperaturas sut nulla. E quai savens temperaturas da duas cifras.

Il pli fraid en las muntognas

Zunt fraid èsi stà en las muntognas. En l'Engiadina ha SRF Meteo mesirà minus 30,9 grads sin il Corvatsch. In nov record da fradaglia hai però betg dà là, quel è tar minus 33,3 grads.

Il pli fraid èsi la notg passada stà a Glattalp en il chantun Sviz cun minus 38 grads. Uschè fraidas temperaturas na sajan dentant nagina raritad en la regiun exponida: Tenor statisticas mesiran ins mintga trais fin tschintg onns temperaturas cumparegliablas u perfin pli fraidas.

Sperta midada da temperatura

Il mardi marvegl saja tenor SRF Meteo anc da quintar cun temperaturas bassas. En il decurs dal di spetgan ins dentant in augment da la temperatura andetg: Sin 2'000 meters stoppia ins quintar ch'i dettia ina midada da pli che 20 grads entaifer dus dis. La gievgia posia dentant puspè dar temperaturas enturn nulla.

RR novitads 11:00