En Svizra èn vegnidas enguladas ils davos dus onns 921 armas da fieu. Tenor l’Uffizi federal da polizia Fedpol sajan passa 80% da las armas, en total 766 armas, vegnidas enguladas suenter ch’i saja vegnì rut en.
Pertutgads il pli fitg dals enguladitschs sajan stads il chantuns Sviz (127 armas) e Berna (104 armas). En il chantun Grischun sajan mo svanidas 19 armas.
Ils chantuns e las ciftras dad armas enguladas
chantun | armas enguladas | armas registradas | armas per chau |
---|---|---|---|
Sviz | 127 | naginas indicaziuns | naginas indicaziuns |
Berna | 104 | radund 40'000 | 40 |
Genevra | 94 | 107'075 | 233 |
Turitg | 92 | 120'300 (dapi 1980) | 85 |
Vad | 91 | radund 125'000 | 170 |
Grischun | 19 | radund 25'000 | 129 |
Tenor Fedpol èn vegnidas enguladas 562 pistolas, 154 schluppets, 101 revolvers, 33 pistolas da sport, 29 replicas u pistolas softair, 16 carabiners da miliar, 15 pistolas da maschina ed 11 pistolas d'alarm. Questas armas èn sparidas.
Il dumber dad armas enguladas saja dentant stabil, rapporta Radio Télévision Suisse RTS. RTS aveva cuntanschì tras il principi da transparenza che la Fedpol publitgescha questas cifras.
RR novitads 06:00+