60% dals requirents d'asil svanids

Tranter il zercladur e l'avust da quest onn èn svanidas fin 60% da las persunas che han dumnadà asil en Svizra. Mario Gattiker, il secretari statal per la migraziun, discurra d'in nov svilup dapi questa stad.

Guardias da cunfin controlleschan in bus cunfugitivs a la staziun da Chiasso.

Legenda da maletgs: Guardias da cunfin controlleschan in bus cunfugitivs a la staziun da Chiasso. Keystone

Las persunas inditgeschian da vulair tschentar la dumonda d'asil, viageschian dentant vinavant avant lur interrogaziun. Quai di Gattiker en intervistas cun pliras gasettas.

Dal zercladur fin l'avust sajan fin 40% da las persunas che han declerà da vulair asil en la Svizra svanidas. Vitiers vegnian 20% che partan irregularmain suenter la dumonda d'asil, uschia Gattiker vinavant. Il problem na sa laschia schliar daltut perquai che las persunas pon sa mover libramain durant la procedura d'asil. La Svizra cumbattia dentant quest problem, tranter auter cun transportar ils requirents d'asil en bus e betg cun il traffic public.

Plinavant dettia dapli persunas che partian irregularmain perquai che la Svizra sa tegnia consequentamain vid la cunvegna da Dublin. Sch'ina persuna è gia registrada en in auter pajais da l'UE, vegnia quella transportada enavos en questa tiara pli spert.

En il Grischun pli paucs

En il Grischun è la situaziun analoga al rest da la Svizra, però discurra Georg Carl, manader da la partiziun per asil e realisaziun da mesiras dal Grischun, da 10% dals requirents d'asil che svaneschian.

RR novitads 07:00