Siglir tar il cuntegn

Header

cuntegn

51'000 fugitivs registrads Repartiziun faira sin ils chantuns è impurtanta

Il dumber da fugitivas e fugitivs da l'Ucraina che tschertgan protecziun en Svizra tschessa: Il mument arrivan mintga di 300 fin 500 persunas en Svizra. Anc avant paucas emnas eran quai 700 per di. Quai ha ditg David Keller dal secretariat statal per migraziun a l'infurmaziun emnila a Berna. Entant ston fugitivas e fugitivs era spetgar main ditg per sa registrar - saja quai per survegnir in letg u il status da protecziun spezial.

Fin uss sajan 51'000 fugitivs registrads en Svizra. Il Secretariat statal per la migraziun quinta fin l'atun cun 10'000 fin 20'000 fugitivs per mais che vegnan en Svizra.

audio
Berna: Point de presse Ucraina – update naziunal
aus Actualitad vom 12.05.2022.
abspielen. Laufzeit 2 minutas 27 Sekunden.

Clav da repartiziun è impurtanta

Actualmain èn almain 7600 plazzas libras en structuras chantunalas e communalas per alloschar fugitivs da l'Ucraina, ha ditg Gaby Szöllösy, la secretaria generala da la Conferenza da las directuras ed ils directurs socials dals chantuns. Il dumber da plazzas en hotels ed alloschis da giuvenils saja tar 38'000, vitiers vegnissan 720 plazzas en abitaziuns. I saja impurtant ch'ils chantuns sajan solidarics in cun l'auter e repartian proporziunalmain las persunas. En pli appellescha ella als fugitivs da sa registrar uschè svelt sco pussaivel, perquai ch'i va per scolaziuns, tschertga da lavur e la garanzia da l'existenza. Be sch'ils chantuns san da lur existenza, pon els gidar. En il chantun Grischun han entant chattà passa 1'000 persunas in suttetg.

Puspè dà liber daners bloccads russ

En connex cun las sancziuns cunter la Russia èn actualmain 6,3 milliardas francs bloccadas en Svizra. Quai è pli pauc ch'anc l'entschatta d'avrigl. Ins haja puspè preventivamain dà liber daners bloccads. Uschia ha infurmà Erwin Bollinger dal secretariat statal per economia Seco. La raschun per la summa pli bassa saja il fatg che las bancas dettian era puspè liber possess. Sco Bollinger ha declerà serrian las bancas daners preventivamain. Lura suondia in'analisa e sco davos vegnia decis definitivamain sch'ils daners duain vegnir bloccads u betg.

RTR novitads 17:00

Artitgels legids il pli savens

Scrollar a sanestra Scrollar a dretga