Siglir tar il cuntegn

Header

cuntegn

Svizra 5 siemis da gieus olimpics svizzers

Swiss Olympic ha envidà ad in’infurmaziun davart la candidatura per gieus olimpics 2026 e gist 5 gruppas en vegnidas. Ussa han ins da concretisar ils siemis.

Gieus pli pitschens

Cun «Agenda 2020» ha il comité olimpic internaziunal IOC simplifitgà las pretaisas envers ils organisaturs. Uschia èsi puspè pussibel d'organisar gieus decentrals. Vul dir, che betg tut las occurrenzas olimpicas ston esser en il medem lieu. Vitiers na vul ins era betg pli il gigantissem sco per exempel tar ils gieus olimpics 2014 a Sotchi. Enavos tar las ragischs – back to the roots – para dad esser la nova devisa. Uschia scriva era il president da Swiss Olimpic, Jörg Schild en la communicaziun:

Jörg Schild
Legenda: Keystone
Nus vegnin a definir da nov ils gieus olimpics d’enviern, sco il 1948 a San Murezzan.
Autur: Jörg Schild President Swiss Olympic

Quests gieus pli pitschens, pli sauns per turissem, l'ecologia e l'economia paran da puspè attrair dapli interess per ils gieus. Uschia er en Svizra.

5 gruppas – in siemi

Gist 5 gruppas èn stadas preschentas a l’infurmaziun da Swiss Olympic.

  • Grischun
  • Valais
  • Gruppa naziunala
  • Svizra Centrala
  • Regiun Lac Lemon

Las gruppas han ussa temp d'inoltrar lur candidatura concreta fin ils 31 da matg. Sandra Felix dal comité Grischun ha ditg, ch'il Grischun veglia far quest pass.

Criteris e pretaisas

Swiss Olympic è responsabel per ina candidatura pussaivla svizra per ils gieus olimpics. Uschia han els era da definir tscherts criteris:

  • l’entira Svizra sto pudair profitar dals gieus olimpics
  • la candidatura sto savair gudagnar l’elecziun dal comité olimpic internaziunal IOC

Vitiers han las candidaturas era d'accumplir suandantas 5 pretaisas:

  • Politica: Las regiuns pertutgadas ston star cleramain davos ina candidatura. Politicamain sco era finanzialmain.
  • Sport: Ils gieus olimpics ston avair in effect da motor per il sport en la regiun. Vitiers duajan ils midaments purtar in avantatg surregiunal.
  • Ambient: Ils gieus ston esser ecologicamain supportabels. Era exponents da la protecziun d’ambient ston pudair star davos l'eveniment.
  • Economia: Ils gieus olimpics ston mussar in sustegn da l’economia locala. Era in program da sponsoring sto la candidatura cuntegnair.
  • Turissem: Il sustegn dal turissem local sto esser grond ed ils gieus olimpics ston rinforzar il turissem local per il futur.

Co enavant?

Suenter l'annunzia concreta d’ina candidatura han las gruppas d'elavurar respostas en differents workshops. Enfin la fin da quest onn han las gruppas da candidatura lura d'inoltrar in dossier a Swiss Olympic. Quel vegn alura controllà sin la realisaziun ed ils criteris definids.

Mo sche Swiss Olympic e persvas d’ina candidatura vegn quella alura era avant il pievel il 2017. Il 2019 decida il Comité internaziunal olimpic lura nua ch'ils gieus olimpics d'enviern 2026 han lieu.

Artitgels legids il pli savens