Tenor la delegaziun da surveglianza da la NEAT è il tunnel da basa dal Gottard pront per vegnir mess en funcziun ils 11 da december da quest onn. Quai scriva ella en ses rapport annual. Il manaschi da test è en funcziun dapi l'october da l'onn passà. Var 450 locomotivists, responsabels per la segirezza ed inschigners lavuran vi da quest manaschi da test.
Fin la fin da matg vegnan fatgs en tut 5'000 viadis da test. Il tunnel da basa vegn a custar 23 milliardas francs.
Altdorf daventa fermada
Suenter l'avertura dal tunnel da basa dal Gottard daventa Altdorf ina fermada per trens da la NEAT a partir dal 2021. Fin lura duai la staziun vegnir cumplettada sco center dal traffic public en il chantun Uri. Las Viafiers federalas surpiglian la realisaziun da l'entir project sco patruna da construcziun, communitgescha la chanzlia chantunala da l'Uri.
Ils custs totals per il project muntian a radund 60 milliuns francs. Da quels surpiglia il chantun fin 15 milliuns. Fin la primavaira 2018 duai esser sin maisa il project cun ils custs detagliads.
RR novitads 11:00