Siglir tar il cuntegn
Inhalt

Svizra 4x «na» ad in uvestgieu da Turitg

Sco las regenzas dal Grischun, Uri e Sviz è er la regenza da Sutsilvania cunter ina spartiziun da l'uvestgieu da Cuira. L'uvestgieu da Cuira, ch'aveva lantschà la discussiun cun in'enquista, vegn a prender posiziun en chaussa la fin da matg.

In uraziun en cattedrala da Cuira.
Legenda: Restar tar quai ch'igl è - l'uvestgieu da Cuira duess restar tar la furma d'organisaziun tradiziunala. Keystone

Uschia prendan las regenzas posiziun tar l’enquista da l’uvestgieu da Cuira. En quella dumonda l'uvestg da Cuira, Vitus Huonder, schebain i fiss eventualmain d’engrà da crear dus novs uvestgieus - quel da Turitg e quel da la Svizra originara.

l'uvestg Vitus Huonder vegn or da la catedrala a cuira.
Legenda: El ha dad evaluar las respostas sin l'enquista - l'uvestg Vitus Huonder vegn or da la catedrala a Cuira. Keystone

Uss ha communitgà l’uvestgieu, ch’el dovria anc temp per evaluar las respostas a l'enquista, cunquai che la participaziun saja pli gronda che spetgada. Ils resultats e - sche necessari - ulteriurs pass vegn l'uvestg da Cuira a communitgar la fin da matg.

In na decis dal chantun Sviz

La posiziun da Sviz è clara: il cussegl guvernativ na vul ni sa separar da l'uvestgieu da Cuira, ni vul el in nov uvestgieu da la Svizra originara. El tema ch'ina separaziun da Turitg pudess disturbar l'equiliber da l'uvestgieu e ch'in uvestgieu da la Svizra originara fiss memia pitschen.

Sutsilvania na vesa betg avantatgs

Ina separaziun na purtassi nagins avantatgs organisatorics - il cuntrari fiss il cas. Novas structuras muntassan plinavant in pli grond burdi finanzial e damain vusch en chapitel, argumentescha la regenza da la Sutsilvania.

In na moderà dal chantun Uri

Il cussegl da regenza uranais na saja da princip betg cunter ina spartiziun, sch’ina tala correspundia a la voluntad dals crettaivels turitgais. Dentant giessan a perder cooperaziuns e sinergias actualas. En pli tema la regenza, ch’ils catolics dal chantun Uri avessan da pajar dapli sco enfin uss.

Dal rapport da la sda resorta, che la regenza dal chantun Uri n’è betg s'exprimida uschè expressivamain cunter ina spartiziun sco la regenza grischuna.

la catedrala da Cuira a l'inauguraziun suenter la renovaziun l'onn 2007.
Legenda: La regenza grischuna sa dosta per la sedia episcopala a Cuira - la catedrala da Cuira a l'inauguraziun suenter la renovaziun l'onn 2007. Keystone

In na fitg decis dal chantun Grischun

La regenza grischuna è clera: tenor ella fiss ina marginalisaziun dal Grischun la consequenza dad ina spartiziun da l’uvestgieu da Cuira en in «uvestgieu da Turitg» ed in «uvestgieu da la Svizra originara». Il Grischun vegniss indeblì sensiblamain, scriva la regenza en sia communicaziun da sia ultima sesida.

Nagin midament dal num en «uvestgieu Cuira-Turitg»

En pli na vul la regenza grischuna er betg, ch'il num «Turitg» vegnia menziunà explicitamain en la designaziun da la diocesa («uvestgieu Cuira-Turitg»). Envers quell’idea haja ella «ina tenuta sceptica enfin refusanta».

En sia communicaziun lascha l’uvestg Vitus Huonder punctuar, che l’idea, da far in uvestgieu cun in num dubel «Cuira-Turitg» na saja betg vegnida lantschada ensemen cun el. L’ordinariat episcopal beneventia che la regenza grischuna è er s’exprimida tar questa idea.

La sedia da l'uvestgieu tutga a Cuira

La regenza punctuescha en sia communicaziun, ch’ella vegn a sa dustar «vehementamain» cunter in'idea eventuala da vulair transferir la sedia da l’uvestg a Turitg. Il uvestgieu saja a Cuira e portia ses num dapi il 5avel tschientaner – e quai duai tenor la regenza grischuna era restar uschia.

RR novitads 10:00/18:00

Ils uvestgieus en Svizra

La Svizra è trapartida en 6 uvestgieus.

Tar la regiun administrativa dal uvestg da Cuira tutgan

  • il chantun Turitg (390’000 catolicAs)
  • il chantun Grischun (90’000 catolicAs)
  • e la Svizra Centrala (200’000 catolicAs)