Siglir tar il cuntegn

Svizra 44% dapli paja per cussegl d'administraziun Raiffeisen

Il cussegl d'administraziun ha gudagnà il 2017 2,41 milliuns francs. Quai èn 43,5% dapli che l'onn avant. Pascal Gantenbein il president ad interim da la gruppa Raiffeisen argumentescha l'augment cun in pli grond sforz che saja vegnì necessari perquai che la banca è ussa relevanta per il sistem.

Purtret da Pascal Gantenbein, president ad interim da la banca Raiffeisen.
Legenda: Pascal Gantenbein il president ad interim da la banca Raiffeisen. Keystone

Pascal Gantenbein argumentescha vinavant ch'il cussegl d'administraziun haja ussa duas persunas dapli. Ils ultims onns ha la banca agì cun grond success ed ils onuraris sajan cumparegliabels cun quels d'autras bancas. Uschia è Gantenbein s'exprimì en l'emissiun ECO dad SRF.

La pli auta bunificaziun ha survegnì l'anteriur president dal cussegl, Johannes Rüegg-Stürm, cun 548'300 francs. Il schef dal concern Raiffeisen, Patrik Giesel ha survegnì 1,81 milliuns, plinavant ha el survegnì sco prevenziun da persunal 601'796 francs. En tut han la direcziun, la direcziun extendida ed il manader da la revisiun interna survegnì bunificaziuns dad 11,03 milliuns francs.

Dapi emnas è la banca en las lingias grassas, surtut en connex cun las investigaziuns cunter l'anteriur schef da la banca Pierin Vincenz.

RR noivtads 06:00