L'ONU dovria urgentamain dapli daners per proteger e proveder per la populaziun dal Jemen. Duas terzas dals carstgauns èn avisads sin agid. L'ONU aveva gia il 2016 schazegià il basegn sin 2,1 milliardas dollars. Enfin uss han els survegnì mo radund 15%, 313 milliuns dollars.
Tenor l'ONU mora mintga 10 minutas in uffant sut tschintg onns pervi da malsognas evitablas. Bunamain 1,2 milliuns uffants sajan sutnutrids ed en privel da vita. L'ONU discurra da la pli gronda crisa umanitara dal mund.
La conferenza dad oz sto esser in mument per mussar la vardad
La conferenza da donaturs è vegnida organisada da Didier Burkhalter ensemen cun Guterres e la Svezia.
Sfundrà en il caos
La revolta da rebels schiits, dals Huthis, ha sfundrà il Jemen l'onn 2015 en il caos. Ils rebels han surpiglià grondas parts dal pajais. Il pajais vischin, la Saudi-Arabia sustegna la regenza cun ina coaliziun militara che bumbardescha posts dals Huthi.
La populaziun civila è per part serrada en tranter fronts. Blers ospitals èn bandunads perquai ch'i n'han nagins medicaments pli. Scolas èn serradas.
Al port Hodeida a la Mar Cotschna nua che passa 80% dal nutriment arriva en il pajais, èn gia numerusas tschaghegnas per stgargiar ils bastiments vegnidas destruidas. Bastiments ston per part spetgar emnas enfin ch'i pon vegnir svidads. Organisaziuns d'agid teman ch'il port pudess vegnir destruì.
La coaliziun militara vul evitar ch'ils rebels pon vegnir furnids cun armas sur il port. Ma senza quel fissi anc pli grev da proveder per la populaziun. Il pajais consista per la gronda part da desert e muntogna. Be radund 5% dal pajais pon vegnir duvrads per cultivar. I na dat nagins flums che portan l'entir onn aua.
RR novitads 14:00