Siglir tar il cuntegn

Svizra 4 policists blessads a Basilea

Tar ina demonstraziun betg autorisada cunter in exercizi da l'armada a Basilea han demonstrants blessà 4 policists cun crappa ed attatgas da laser.

Demonstrants a Basilea
Legenda: Tut ensemen èn 8 persunas vegnidas arrestadas. Keystone

Tenor la procura publica da Basilea-Citad munta il donn material ad almain 100'000 francs. Numerusas fanestras, portas, vitrinas e pitgas da reclama sajan vegnidas sfratgadas en. Plinavant hai dà grevs donns vi da vehichels da la guardia da cunfin e da la polizia.

Var 300 persunas han demonstrà il venderdi saira cunter l’exercizi Conex 15, al qual l'Armada svizra trenescha tranter auter da segirar il cunfin.

Ulteriura demonstraziun a Son Gagl

Pliras 100 persunas han demonstrà paschaivel a Son Gagl cunter la guerra e per recepir dapli fugitivs. Ils organisaturs da la manifestaziun discurran da radund 500 persunas che sajan sa participadas, tenor la polizia son gagliaisa eran quai radund 350 persunas. En il center da la manifestaziun eran la Siria e l’Eritrea.

Clamà a la demonstraziun «evitar la guerra e recepir fugitivs» ha il Cussegl per la pasch svizzer e pliras ulteriuras organisaziuns da la Svizra orientala.

RR novitads 08:00 / 15:00 / 18:00