Siglir tar il cuntegn
cuntegn

Svizra 30 milliuns per nov bajetg da la staziun da tren ad Andermatt

L’emprima palada per il nov bajetg da la staziun è fatga. In project communabel da la BVZ Holding, la Andermatt Swiss Alps SA e la Schmid Holding SA che custa 30 milliuns.

Il bajetg duai esser in lieu d’arrivada attractiv per ils giasts ed era colliar la part istorica dad Andermatt cun il vitg da vacanzas Andermatt Reuss che vegn realisà da Samih Sawiris. Per la realisaziun da quest bajetg cun il num «Andermatt Central» è vegnì fundà la societad anonima Andermatt Central SA. Ils partenaris per quella societad èn la BVZ Holding cun 50%, la Andermatt Swiss Alps SA e la Schmid Holding SA cun mintgamai 25%. Il bajetg vegn construì en il nord da la staziun da viafier. El cuntegna sin 9'000 meters quadrat biros, localitads per butias, ustarias, turissem, spurtegls, parcadis ed abitaziuns. Ils custs en tar 30 milliuns francs. L’emprima part dal bajetg vegn averta il december 2018. La fin 2019 duai lura l’entir bajetg esser a fin.

Abitaziuns per indigens e lavurers

Alice Kalbermatter, presidenta dal cussegl d'administraziun da la Andermatt Central SA.
Legenda: Alice Kalbermatter, presidenta dal cussegl d'administraziun da la Andermatt Central SA, ha preschentà il project. RTR, Gion Hosang

Sco la presidenta dal cussegl d’administraziun da la Andermatt Central SA, e scheffa da finanzas da la BVZ Holding Alice Kalbermatter di, è l’investiziun en immobiglias ina impurtanta sparta da fatschenta. Questa sparta possia la holding a la quala era las viafier Matterhorn Gottard appartegna, segirar il resultat da fatschenta. Las 48 abitaziuns dad 1,5 fin 4,5 stanzas ch’i dat en quels bajetgs èn concepidas sco abitaziuns per abitants e lavurers dad Andermatt. Quai saja in grond basegn e la dumonda da talas abitaziuns vegnia anc a crescher, ha Alice Kalbermatter ditg. Perquai na sajan quai betg abitaziuns da luxus mabain abitaziuns pajablas.

Collaziun tranter vegl e nov

L'investider Samih Swiris è fitg interessà da vesair co las lavurs progredeschan.
Legenda: L'investider Samih Swiris è fitg interessà da vesair co las lavurs progredeschan. RTR, Gion Hosang

Per l’investider Egipzian che construescha il vitg da vacanzas Andermatt Reuss è il nov bajetg fitg impurtant. La staziun represchentia il vitg ed ad Andermatt dettia quai ussa ina da las pli bellas staziuns da la Svizra manegia el. Impurtant saja quest bajetg era perquai ch’el vegnia a daventar in lieu d’inscunter e perquai ch’el saja colliaziun tranter ses vitg da vacanzas Andermatt Reuss ed il vitg istoric d'Andermatt.

La staziun è a fin il 2024

Era uschiglio vegn bajegià enturn la staziun d’Andermatt mordio. Sin Nadal vul'ins avrir il nov sutpassadi. Tras quel pon ins tranter auter ir da la staziun directamain tar la sutgera che maina en il territori da skis vers il Gütsch. Davent da l’auter onn vegnan era ils perruns da viafier construids da nov e cuverts cumplettamain. Fin 2024 duain tut las lavurs enturn la staziun d’Andermatt esser terminadas.

RR novitads 17:00