Siglir tar il cuntegn
cuntegn

Svizra 25'000 francs per unfrendas da mesiras da provediment

Il 2018 survegnan unfrendas da mesiras da provediment ina contribuziun da solidaritad. Entant èsi cler ch'ins po pajar a tut quels che han fatg ina dumonda ina summa da 25'000 francs.

Bleras bancnotas.
Legenda: Ils pertutgads survegnan la summa previsa maximala. (maletg simbolic) Keystone

L'atun 2016 eran vegnids approvads totalmain 300 milliuns francs per contribuziuns da solidaritad per unfrendas da mesiras da provediment. La summa da las singulas contribuziuns dependeva damai dal dumber da dumondas. Cunquai ch'ins sa ussa ch'i vegnan ad esser pli pauc che 12'000 dumondas approvadas po l'Uffizi federal per giustia uss garantir la summa previsa maximala: 25'000 francs.

4'310 dumondas – pli paucas che spitgà

Il termin per far ina dumonda scroda la fin mars. Enfin uss èn 4'310 unfrendas dumondas vegnidas inoltradas. Quintà avev'ins cun 12'000 enfin 15'000. Las dumondas vegnan cunzunt da persunas sur 75 che vivan en cundiziuns finanzialas cumplitgadas.

Prioritad han gì las dumondas da las unfrendas ch'èn malsaunas ni fitg veglias. 336 persunas survegnan uschia gia il schaner 2018 la contribuziun da solidaritad. Tut las autras dumondas elavura l'Uffizi federal per giustia en il decurs da l'onn 2018.

Pli che 1'000 persunas han gia survegnì ina summa tranter 4'000 e 12'000 francs ora dal budget per agid direct perquai ch'i sa chattavan finanzialmain en ina situaziun d'urgenza.

Pertutgads en Svizra

Mesiras da provediment èn vegnidas ordinadas en Svizra enfin il 1981. Plirs 10'000 uffants e giuvenils eran vegnids plazzads sin purarias ni en chasas d'uffants. Blers dad els èn vegnids maltractads ni malduvrads. Persunas èn vegnidas sfurzadas da sa laschar sterilisar, èn vegnidas duvradas per emprovas da medicaments u vegnidas messas en praschun senza sentenzia.

RR novitads 18:00

Mesiras da provediment

Tar unfrendas da mesiras da provediment è l'integritad psichica u sexuala vegnida restrenschida. Era sche lur svilup psichic è vegnì restrenschì entras il plazzament tar esters ordaifer la patria valan ellas sco unfrendas.