Siglir tar il cuntegn
cuntegn

Svizra 24 milliardas francs per serrar in'ovra atomara

La gronda part dals custs resultan per dismetter il rument radioactiv. Quella part fa ora passa 80% dals custs.

L'ovra atomara Mühleberg.
Legenda: L'ovra atomara Mühleberg è l'emprima ovra che vegn serrada giu en Svizra. Keystone

Serrar las ovras atomaras e dismetter il rument radioactiv custa passa 24 milliardas francs. Il pli bler custi da dismetter il rument radioactiv. Lezza cumpart fa ora dapli che 80% dals custs totals. Quai ha il departament federal per energia calculà. Indirect fixeschan quests custs totals, ils imports ch’ils manaschis han da pajar en il fond per serrar las ovras e per dismetter il rument radioactiv.

Naginas novas ovras atomaras

Cun il Gea a l'urna davart la lescha d'energia e cun quai a la strategia d'energia 2050, ha la populaziun svizra decis da sortir pass per pass da l'energia atomara. Tranter auter èsi scumandà da construir novas ovras atomaras. Las ovras atomaras existentas duain restar en funcziun uschè ditg ch'ellas èn segiras. Ovras che n'èn betg pli segiras ston vegnir serradas giu.

Mühleberg è l'emprima ovra che vegn serrada giu

Entant èsi planisà da serrar in'ovra atomara: Il 2019 duai l'ovra Mühleberg en il chantun Berna vegnir serrada giu. Previs èsi che quella è fabritgada enavos cumplettamain fin il 2034. Mühleberg è uschia l'emprima ovra atomara da la Svizra che vegn serrada giu.

RR novitads 12:00