Siglir tar il cuntegn
cuntegn

Svizra 200 milliuns damain per instituts da perscrutaziun federals

La ETH da Turitg, la Scola politecnica da Losanna ed ils quatter instituts da perscrutaziun federals ston spargnar. Perquai che la Confederaziun fraina las expensas per furmaziun, perscrutaziun ed innovaziun ston vegnir spargnads 200 milliuns francs sin il sectur da l'ETH ils proxims quatter onns.

Paul Scherrer Institut (PSI).
Legenda: Temps cun finanzas pli stretgas spetgan er il Paul Scherrer Institut (PSI). Keystone

La Confederaziun spargna en ils champs da furmaziun, perscrutaziun ed innovaziun durant ils onns 2017 fin 2020. Quai curs da spargn ha consequenzas directas per la ETH Turitg, la Scola politecnica a Losanna e quatter autras instituziuns da perscrutaziun federalas. Questas consequenzas custan radund 200 milliuns francs.

Spargnar, er cun auzar taxas da studi

Ils meds finanzials per il 2017 n'èn però anc betg fixads definitivamain. Tuttina ha il cussegl da l'ETH gia instradà in pachet da spargn cumplessiv. En questa runda da spargn ston er projects da muntada naziunala serrar pli stretg la tschinta, sco per exempel il center da calculaziun da gronda prestaziun da la ETH Turitg a Lugano u il SwissFEL (Freie-Elektronen-Röntgenlaser) dal PSI a Würenlingen.

Cesuras vegni er a dar tar projects da construcziun, sanaziun e tar ils budgets da manaschi da las instituziun. Plinavant ston ils students far quint cun pli autas taxas da studi. Actualmain vegn evaluà in auzament a partir da l’atun 2018 ch’è raschunaivel ord vista sociala.

RR novitads 16:00