Suenter il Cussegl naziunal ha uss er il Cussegl dals chantuns dublegià il temps ch'ina persuna po purtar plant en cas ch'ella è daventada victima d'in accident u d'ina malsogna. Dà l'impuls per la midada han ils cas da cancer pervi dad asbest. Il material è bain scumandà dapi il 1989, la malsogna po dentant anc rumper ora blers onns suenter ch'ina persuna ha inhalà las fibras.
Gist per tals cas sajan tut tenor er 20 onns temp da surannaziun memia pauc, hai gì num en il Cussegl dals chantuns. Cun installar in fondo d'indemnisaziun hajan ins pudì meglierar la situaziun da persunas pertutgadas sco er dals confamigliars.
Malgrà quai saja la prolungaziun dal temp da surannaziun sin 20 onns in bun cumpromiss tranter ils basegns e las pretensiuns da persunas ch'èn daventadas victimas dad accidents u malsognas, las pretensiuns dal Tribunal europeic per ils dretgs umans e l'obligaziun d'archivar pli ditg ils documents correspundents. Il Cussegl federal aveva proponì in temp da surannaziun da 30 onns.
RR novitads 12:00