Siglir tar il cuntegn
cuntegn

Svizra 20 dis liber per babs

L'iniziativa per in congedi da paternitad po vegnir inoltrada questa stad. Ils iniziants han rimnà entaifer in onn pli che 120'000 suttascripziuns.

Ins vesa las chommas d'in pop che giascha sin il pèz dal bab. Dal bab ves'ins mo in bratsch ed il pèz.
Legenda: Avunda suttascripziuns per l'iniziativa per in congedi da paternitad. Keystone

L'iniziativa dal pievel per in congedi da paternitad è in pass vinavant. Sco quai ch'ils iniziants han communitgà, hajan els ramassà passa 120'000 suttascripziuns. L'iniziativa vegnia innoltrada anc questa stad. Lantschà l'iniziativa avevan las uniuns tetgalas dals lavurants Travail.Suisse, l'uniun Pro Familia Svizra, l'uniun tetgala da las dunnas Alliance F e l'organisaziun dals umens e babs männer.ch.

L'iniziativa pretenda in congedi da paternitad flexibel da 20 dis. Tenor ils iniziants duajan ils babs savair decider ensemen cun ils patruns co els retirian quels dis da congedi. Imaginabel saja ch’in um retiria duas emnas direct suenter la naschientscha ed ils ulteriurs diesch dis flexibel durant l’emprim onn da vita da l’uffant. Pussibel saja dentant era da retrair sur 20 emnas mintgamai in di per emna.

RR novitads 14:00