Siglir tar il cuntegn
cuntegn

Svizra 2 x Nadal – regalar pachets virtuals è in trend

Bunamain 66’000 pachets cun regals ha la 20avla acziun 2 x Nadal purtà. La repartiziun en la Svizra ed en l’Europa da l’ost cumenza la fin da schaner.

Mangiativas ed autra rauba sin ina maisa
Legenda: 2 x Nadal a Trun, ina part da la rauba rimnada. RTR, Annina Campell

La pli gronda part dals pachets, numnadamain 64’000, èn vegnids tramess cun la posta a l’acziun 2 x Nadal u deponids directamain tar la Crusch cotschna svizra. Vitiers vegnan passa 500 pachets che persunas han empustà online tar Coop.

La moda da sa participar a l’acziun sa midia adina pli fitg. Quai communitgescha la Crusch cotschna svizra che fa l’acziun 2 x Nadal ensemen cun la SRG SSR e cun la Posta svizra. Adina dapli arrivian ils regals sco pachets virtuals.

Tals pachets virtuals han 1’600 persunas empustà e pajà via internet. Cun ils 170’000 francs pajads uschia cumpran societads naziunalas da la Crusch cotschna mangiativas en l’Armenia, en la Bielorussia, en la Moldavia, en la Bosnia, en la Erzegovina ed en la Bulgaria. Quai spargna transports cun camiuns sur millis da kilometers.

RR novitads 16:00