En la segunda conferenza da medias dal Cussegl federal dad oz han ils cussegliers federals Guy Parmelin ed Alain Berset infurmà davart il stan actual en il cumbat cunter il coronavirus.
- Il minister da l'intern Alain Berset ha ditg che la situaziun restia anc pli ditg difficila.
- En pli ha Berset infurmà davart la situaziun actuala en il chantun Tessin.
- Il minister d'economia Guy Parmelin ha infurmà davart ulteriuras mesiras per l'economia.
Il minister da l'intern, Alain Berset, lauda la collavuraziun «excellenta» cun ils chantuns. Ins haja bainbaud fatg 10'000 tests sin 1 milliun abitants. Uschia haja la Svizra probablamain ina da las pli autas ratas da test da l'entir mund, probabel schizunt la pli auta.
El saja cuntent sco la populaziun realiseschia las mesiras da la Confederaziun. Ins stoppia uss guardar che la disciplina tegnia pli ditg, uschia Berset. I sa tractia dad in maraton e betg d'in sprint.
Ulteriuras mesiras per sustegnair l'economia
Sco proxim infurmescha il minister d'economia, Guy Parmelin, davart ulteriuras mesiras per l'economia:
- L'obligaziun d'annunziar plazzas libras vegn temporarmain abolida. Uschia duajan process da recrutar vegnir simplifitgads.
- Igl n'è betg pli necessari da cumprovar stentas da tschertgar ina plazza envers l'assicuranza cunter la dischoccupaziun.
- 120 diarias da l'assicuranza cunter la dischoccupaziun per impedir che persunas vegnian privadas dal dretg da schurnada.
- La lubientscha d'introducir lavur curta vegn prolungada da 3 sin 6 mais. La finamira è da reducir il dumber da dumondas e d'accelerar la procedura.
Dentant saja il Cussegl federal conscient che bleras dumondas sajan anc avertas. L'agid saja dentant sin via. Ordavant aveva gist il cusseglier federal Ueli Maurer infurmà ch'interpresas pitschnas e mesaunas possian a partir da damaun dumandar per credits en connex cun il coronavirus.
Lubientscha per exports
Plinavant haja il Cussegl federal decis ch'i dettia da nov in'obligaziun da dumandar ina permissiun per exportar equipament da protecziun medicinal. L'excepziun vicendaivla saja il commerzi tranter la Svizra ed ils stadis commembers da l'UE e da l'EFTA.
Dumondas per lavur curta
Per 484'000 emploiads sajan fin ier saira vegnidas inoltradas dumondas per lavur curta. Quai correspundia a 9,5% da tut ils lavurers. Quai n'haja anc mai dà, uschia Parmelin.
Differenzas cun il Tessin
Il minister da sanadad, Alain Berset, infurmescha davart la situaziun actuala en il chantun Tessin. Là saja la situaziun difficila. Ins cumbattia cunter ina ferma epidemia. Il Cussegl federal haja prendì enconuschientscha da las decisiuns dal chantun Tessin. L'Uffizi federal da giustia haja fatg cler quest'emna ch'ins cuntrafetschia al dretg federal da serrar firmas e plazzals en general.
Il Cussegl federal saja vinavant en contact cun las autoritads tessinaisas. Els tschertgian ensemen ina schliaziun, uschia Berset.
Mascras da protecziun svizras
La producziun da mascras da protecziun en Svizra duaja uss cumenzar. Las maschinas da producziun necessarias sajan entant arrivadas. Quai ha ditg Daniel Koch da l'Uffizi federal da sanadad. Per di duajan radund 40'000 mascras da protecziun vegnir producidas.
Tenor Koch èsi anc memia baud da dir, sche las mesiras hajan gia in effect sin il dumber d'infecziuns novas u betg. Uss giaja persuenter d'analisar las cifras. Els veglian anc s'exprimer quest'emna en quest connex. Il medem mument ha Koch fatg cler ch'i na saja anc betg pussaivel da trair ina conclusiun.