Las pendicularas svizras tiran gia avant ils firads da Pasca ina bilantscha da la stagiun d’enviern 2016/2017. Il dumber dals osps saja sa reducì per 2,9% e la svieuta da transport per 0,5%, quai mussa il monitoring da las pendicularas svizras.
Il chantun Grischun, il Vallais e la Svizra centrala nodan sulet perditas moderatas, uschia noda il Grischun in minus da 2,1% tar ils osps. En media sur 5 onns noda il Grischun dentant ina digren da 7,5%. Guardà sur l’entira Svizra è il minus da giasts sur la media da 5 onns tar 14%.
Mal cumenzament da la stagiun
Gia la terza giada en roda han ils territoris da skis gì da cumbatter cun Nadal senza naiv. Mo territoris cun cundrizs d'ennavar artifizialmain han pudì avrir las pistas. Quai era manà tar in resultat mal tar ils giasts. -12,6% giasts han las pendicularas Svizras nudà e radund 4% pli pauc svieuta. Il start da la stagiun è cun quai stà perfin anc pli mal ch'il resultat schlet da l'onn avant.
Il schaner e favrer han las pendicularas lura pudì nudar cifras positivas, damai che la naiv è lura tuttina anc vegnida giu enfin en la Bassa. Il mars èn las frequenzas dentant puspè sa sminuidas in pau uschia che las cifras positivas dal favrer èn puspè ruschnadas en il minus.
Tenor Meteo Svizra è l'enviern passà stà extraordinariamain sitg. I haja da be circa mez uschè blera plievgia sco la media. Intginas regiuns (il Vallais e la Svizra dal vest) han perfin nudà il pli sitg enviern dapi decennis.
Anc è la stagiun dentant betg dil tut a fin. En ils territoris pli auts pon ins anc adina ir cun skis cun bunas cundiziuns da pistas. Intgins territoris èn anc averts enfin Pasca. Intginas staziuns perfin enfin il matg.
RR novitads 12:00
