Siglir tar il cuntegn

Svizra 100 milliuns per la mobilitad dal futur

L'ETH, la SBB e l'industria vulan investir communablamain en il traffic futuristic. Cun collavurar vulan els promover pli spert trens senza manischunz e la mobilitad dad isch tar isch.

Exposiziun da mobilitad futuristica en il Museum Svizzer da Transports.
Legenda: Co vegn la mobilitad futur a vesair or? L'ETH, la SBB e la confederaziun han gia intginas ideas. Keystone

La ETH Turitg, la SBB e l'industria Svizra vulan proseguir communablamain ina finamira: Els vulan promover la mobilitad futuristica. Quai includa cunzunt trens senza manischunz e la mobilitad dad isch tar isch. Sco ch'ils partenaris d'industria han communitgà al WEF a Tavau prevesan els investiziuns da 100 milliuns francs en ils proxims 10 onns per cuntanscher la finamira.

Autos autonoms: pli ecologic e pli segir

Il president da l'ETH Lino Guzella, il schef da la SBB Andreas Meyer, ministra da traffic Doris Leuthard ed experts da l'ETH han lura er preschentà lur ideas durant dal Forum mundial d'economia. Uschia duain per exempel autos autonoms, vul dir autos senza manischunz, remplazzar autos privats. Il sistem funcziunass sumegliant ad in servetsch da taxi local. Il traffic fiss betg mo pli ecologic, mabain er pli segir: Autos autonoms san reagir bler pli spert che umans.

Jau sper che la purschida saja colliada uschè bain ch'ins vegnia betg ina giada sin l'idea da prender l'agen auto sin l'entir traject.
Autur: Roland SiegwartProfesser da l'ETH per roboters mobils

30% dapli trens tras innovaziun

Er la SBB duai profitar d'innovazins. Uschia savessan ins cun la digitalisaziun augmentar il dumber da trens per 30%, uschia Meyer. Las distanzas tranter dus trens pudessan vegnir sminuidas e l'utilisaziun da la rait optimada.

Anc nagin partenaris privats

Partenaris da l'industria privata na datti anc nagins. Leuthard sa mussa dentant optimistica, la fiera mundiala per ina nova furma da mobilitad saja gronda. La ETH hajan in bun resun ed ins chattia uschia ch'ins chattia spert investurs.

Finanziada vegn questa iniziativa dentant sulettamain da la ETH, la SBB e privats. La confederaziun n' investescha tenor SRF betg en l'iniziativa.

RR novitads 10:00