Siglir tar il cuntegn
Inhalt

Svizra 1 milliarda per gieus olimpics sche Sion survegn chaschun

Per la candidatura da Sion 2026 metta il Cussegl federal a disposiziun 8 milliuns francs. En cas ch'il gieus olimpics vegnissan propi surdads en Svizra è il Cussegl federal pront d'investir enfin ina milliarda.

Purtret da rintgs d'olimpia ed il logo da Sion 2026.
Legenda: Sion 2026 vul la Confederaziun sustegnair cun enfin ina milliarda francs. Keystone

Il Cussegl federal vul sustegnair la candidatura svizra per ils gieus olimpics 2026 cun 8 milliuns francs. Quai è var in terz dals custs ch'ils organisaturs prevesan. Organisar ils gieus olimpics saja ina gronda schanza per il sport, l'economia e la societad en Svizra, manegia il Cussegl federal. Perquai vul el sustegnair il project «Sion 2026».

Fin ina milliarda duai dar

Sch'il Comité olimpic internaziunal surdat ils gieus definitivamain a la Svizra è il Cussegl federal pront da dar ora fin ad ina milliarda francs. Uschia ademplescha el ils giavischs dal comité d'organisaziun. Quel prevesa expensas da radund 1,98 milliardas ed entradas da radund 1,15 milliardas. Qua duai la Confederaziun sustegnair cun garanzia da deficit.

Infrastructura e segirezza

Cun 31 milliuns francs vul il Cussegl federal finanziar cun l'infrastructura specifica per ils gieus olimpics. Ils organisaturs planiseschan per gliez en tut 100 milliuns francs. Ils custs per la segirezza muntian tenor organisaturs a 303 milliuns francs. La Confederaziun duai surpigliar 20% dals custs da polizia dals chantuns, quai fissan 44 milliuns francs. Per custs supplementars vul il Cussegl federal planisar 85 milliuns.

Cun quests custs suonda il Cussegl federal il giavisch dal comité d'organisaziun. Il president dal comité, Jean-Philippe rochat aveva la stad ditg ch'el speria sin 0,8 enfin ina milliarda francs.

Decisiuns parlamentaricas e dal pievel

Il Cussegl federal ha dentant er ditg ch'in project dîna taladimensiun saja avisà sin il sustegn dal maun public. Decisiv per la decisiun dal Cussegl federal saja stà ch'il project bajegia si sin infrastructura che saja gia avant maun e ch'ils gieus vegnian organisads tenor novas directivas per la persistenza.

Il project saja dentant er avisà sin il sustegn dal public. La participaziun da la Confederaziun possia be vegnir garantida sch'il parlament ed er la populaziun dals chantuns pertutgads sa decidan da sustegnair il project. Tar ina decisiun negativa en in chantun possian ulteriurs lieus vegnir en dumonda.

RR novitads 14:00