Tenor il rapport da l'institut «Sipri» per perscrutar la pasch a Stockholm è la Svizra il 14avel pli grond exportader d'armas dal mund. Il pli grond exportader d’armas dal mund restan ils Stadis Unids da l’America cun 33% da tut ils exports. Suandà da la Russia (25%), la China (5,9%), la Frantscha (5,6%) e la Germania (4,7%). Questas 5 naziuns èn responsablas per bun 2/3 da tut ils exports d'armas.
Bleras armas van en il Proxim Orient
La coaliziun dals stadis Arabs cumpra en l’emprima lingia armas en ils Stadis Unids da l’America u en l’Europa. Malgrà il bass pretsch per ieli èn pliras furniziuns d’armas anc planisadas proximamain en il Proxim Orient. La regiun ha importà per dus terz dapli armas tranter ils onns 2011 e 2015 en cumparegliaziun cun ils onns 2006 fin 2010.
L’Arabia Saudita ha augmentà l'import d’armas tranter ils onns 2011 e 2015 per radund 275%. Cun ina cumpart da 7% dals imports d’armas globals è l’Arabia Saudita sin il segund plaz. Il pli grond importader d’armas è l’India cun 14% e terz grond importader è la China cun 4,7%.
Armas svizras van per gronda part en Germania
Tenor las cifras da l’Administraziun federala da duana è la Germania il pli grond importader d’armas svizras. Quai ils ultims 4 onns. Il 2011 eran dentant ils Emirats Arabs Unids il pli grond importader d'armas svizras. L’emirat aveva cumprà il 2011 aviuns da trenament en la valita da 258 milliuns francs en Svizra.
Er en l’Arabia Saudita ha la Svizra exportà material da guerra. Ils onns 2011 fin 2013 mintgamai per radund 20 milliuns francs ed il 2014 per radund 3 milliuns francs. Per l’onn 2015 na datti anc naginas cifras definitivas.
RR novitads 14:00