Siglir tar il cuntegn

Header

Navigaziun

In indrez da bittar granatas e dus schulads dasperas.
Legenda: En tals indrizs da bittar granatas vul il Cussegl naziunal investir 404 milliuns francs. Keystone
cuntegn

Svizra 1,3 milliardas per nov material d'armada

L'armada po impunder quest onn 1,3 milliardas francs per armas, vehichels ed auter material. Quai ha decidì il Cussegl naziunal. Il pli grond ed il pli dispitaivel post è l'acquist d'in sistem per bittar granatas, per 404 milliuns francs.

Ils 32 chanuns da 12cm novs duain serrar la largia ch'è vegnida averta il 2009 cun metter ord servetsch tancs cun la medema grondezza da muniziun.

Ils bittagranatas èn integrads en tals tancs tal tip «Piranha».
Legenda: Ils bittagranatas èn integrads en tals tancs tal tip «Piranha». Keystone

L'acquist da questas armas saja dispitaivel damai ch'i na saja betg da spetgar che la Svizra vegnia attatgada a moda directa militara, uschia l'avis da la sanestra. Quest maletg da guerra saja antiquà e na correspundia betg al temp dad oz. En quest temp saja da sa preparar per attatgas da cyber e da terrorissem, qua saja da chattar respostas.

La gronda part dal parlament è dentant da l'avis ch'il militar dovria differentas abilitads. Uschia han els fatg valair cun 135 vuschs cunter 52 vuschs. Ils ulteriurs projects d'armaziun n'han betg gì problems da passar.

Nagina resposta en tge che duai vegnir investì

Betg vulì discutar ha la chombra gronda davart in nov credit da rama per ils proxims quatter onns, uschia che quel resta tar 20 milliardas francs. La Partida socialdemocratica (PS) vuless ch'il Cussegl federal declera per tge ch'ils daners vegnian investids. Oz nagin che sappia dir per tge che tants daners duain vegnir investids. Il Cussegl federal aveva proponì mo 18,8 milliardas.

RR novitads 11:30