La sonda da mezdi n’hai betg dà colonnas avant l’entrada da la Stadthalle a Cuira. Ma tuttina entran e bandunan persunas en il tact da minuta il stabiliment. Las persunas vegnan quest di ord differents motivs a sa laschar vaccinar spontanamain. Ina dunna declera ch’ella giaja l’emna proxima en vacanzas ed haja atgnamain gì pir lura in termin. Ma organisatoricamain saja quai stà meglier da sa laschar vaccinar anc quest’emna. In’auter ha gì liber ed ha decis spontan da sa laschar vaccinar. Per tuts saja questa flexibladad fitg agreabla.
Nagins incaps organisatorics
Phillipa Golling è ina da las medias responsablas en il center da vaccinaziun. Las visitas spontanas na sajan betg stadas in problem. Cunquai ch’il team en la Stadthalle lavuria gia dapi pliras emnas ensemen, hajan els ussa rutina e sajan uschia stads bain preparads.
Per quels che na vulan betg spetgar ditg, u quels ch'han retegnientschas da far in termin, è questa acziun optimala.
Uschia vesa era Martha Crameri che lavura tar il check-in la situaziun. Il sulet ch’è dà en egl ad ella è, che las persunas senza termin sajan in zic main preparadas, perquai ch’igl è da tschiffar dapli datas che tar insatgi ch’ha in termin.
Bilantscha positiva
Entaifer dus dis èn 420 persunas sa vaccinadas durant il «Walk-in». In resultat positiv, declera Roland Leuthold, il manader da l'uffizi per sanadad dal Grischun. Ina finamira concreta, quantas persunas ch’els veglian cuntanscher n’han els betg gì. Ma i saja stà grondius da vesair che plirs tschients èn sa participads. Ussa veglia l’uffizi examinar, sche e co i fa senn da schlargiar questa purschida sin l’entir Grischun.