Abitar a Surrein senza quest guaud da protecziun sur il vitg na fissi betg pussaivel. Quai di il selvicultur da la vischnanca da Sumvitg Flurin Cathomas. Senza il guaud da protecziun avess il vitg da Surrein problems cun lavinas, cun auas, cun crudada da crappa ed er cun bovas. Ils da Surrein san pia propi discurrer da cletg ch’i han quest guaud.
Il territori il pli periclità è quel davent da Giachentrina fin Reits. Reits e Giachentrina, quai è l'emprima part dil vitg, sch'ins vegn davent da Cumpadials a Surrein.
I dat differents facturs per il privel
Ils facturs, daco che Surrein è uschè periclità da bovas, èn differents. In motiv saja per exempel la pendenza, di Flurin Cathomas. Sisum il guaud saja la pendenza fin 150%, quai saja enorm. Uschia è vegnì investì blers daners en quest guaud. Dapi ils onns 90 bun 7 milliuns francs, quai cun tgira da guaud, lavineras ed era vias.
Il guaud porscha ina tscherta protecziun
Il guaud sur Surrein pussibilitescha pia insumma l’abitar a Surrein. Encunter ina bova da grondas dimensiuns – sco la bova en Val il 1980 – savessi dentant era il guaud na betg far bler. In guaud porschia numnadamain mo ina tscherta protecziun, di il selvicultur da 33 ans.