Siglir tar il cuntegn
cuntegn

Mes vitg ed jau Sin ils fastizs da la «prema»

Sagogn è enconuschent per sia puma. Surtut la «prema» è tschertgada per far confitura, vinars, pettas e cumpot. Questa sort da puma che vesa ora in zichel sco ina primbla / «zuesca» e che gusta in zichel sco ina paloga pon ins dentant era giudair directamain giu da la planta.

Dentant il medem sco primblas u palogas n’èn ellas betg, las «premas»: qua èn Gion e Dumeni Antoni Cavelti perina. Els èn creschids si cun curtins da puma a Sagogn. Ils vischins dal redactur Maurus Candrian enconuschan il abc da la «prema», la puma ch’è in zichel pli pitschna che primblas u palogas.

Gia Gion Cadieli, l’autur e plevon da Sagogn, ha menziunà ils pumers en l’emprima strofa da sia poesia «In dils bials de tut la Foppa» dal 1936 :

In dils bials de tut la Foppa

Ei finfatg il vitg Sagogn,

Sco en tgina ina poppa

Dorm’el sper il Rein e Glogn.

Circumdaus da tschiens pumera

Che flurescha de smarvegl,

Lunsch naven dalla canera,

Sa ‘l semiar el clar sulegl.

Sper la maila, las tschareschas, la paira, la cudogna e las primblas / «zuescas» ha el franc er patratgà vi da la «prema» durant scriver questa poesia.