Siglir tar il cuntegn
Inhalt

Mes vitg ed jau La Platta Pussenta e sias detgas

La Platta Pussenta sa chatta datiers dal cunfin da Schluein, Sagogn, Laax e Falera. Ella è ina platta da scalutta, vul dir in crap cun cuppas.

Gia en l’antica ha in pievel pajaun, pli probabel ils Rets, unfrì per exempel latg a lur Dieus sin la Platta Pussenta. Quai dian archeologs ed istorichers, dentant senza avair mussaments definitivs. Pli tard era la Platta Pussenta lura in terren fritgaivel per istorgettas e detgas sco per exempel quella dal stgazi che duess esser sut la platta, di Martin Bundi da Sagogn. L’istoricher ed anteriur cusseglier naziunal è in expert per l’istorgia da Sagogn e la regiun da la Platta Pussenta.

Martin Bundi sin la Platta Pussenta a Sagogn.
Legenda: Martin Bundi sin la Platta Pussenta a Sagogn. RTR, M. Candrian

Betg lunsch davent da la Platta Pussenta sa chatta in’autra platta da crap, numnadamain la Platta d’Enzennas. Quella vegni savens er numnada Platta Pussenta, quai na constettia dentant betg direct. Ella saja effectiv il crap da cunfin da las quatter vischnancas Sagogn, Schluein, Falera e Laax, di Martin Bundi. Quai vesian ins vid las gravuras dal 16avel tschientaner sin la Platta.

Il conturn istoric e natiral da la Platta Pussenta è danovamain vegnì fatgs passabels en connex cun il project Platta Pussenta tranter il 2002 ed il 2007. Davent da lura procura la fundaziun Platta Pussenta che la natira ed il conturn istoric en la spunda tranter Schluein, Sagogn, Laax e Falera restian intacts.