Siglir tar il cuntegn

Header

Navigaziun

Rudlof Rominger
Legenda: Rudolf Rominger ad ina cursa da Slalom als champiunadis Svizzers l'onn 1938. jawalker.ch
cuntegn

Mes vitg ed jau In quadrupel campiun mundial da la Val Fex

El era quadrupel campiun mundial in skis. Slalom e cursa rapida ils onns 1934 enfin 1939 ha Rudolf Rominger gudagnà quasi tut quai ch'i deva da gudagnar. Creschì si è el en la Val Fex, a Crasta sin in bain puril. Mintga di è el ì a scola cun ils skis, sco tut ils uffants da Fex da quels onns.

La famiglia Rominger stat uss schon dapi 7 generaziuns en Val Fex. L'emprim ch'era immigrà da la Germania era Johannes Rominger, in chalger.
Il pli enconuschent e famus era e resta dentant Rudolf Rominger, sco quadrupel campiun mundial da skis.

Va en emblidanza

Ma era ses num n'è betg pli enconuschent a blers. La famiglia sa regorda anc vi d'in um che stueva esser ina gronda persunalitad. In bel giuven ed in um modest, en la vegliadetgna per gronda part retratg.

Rudolf è naschì l'onn 1912 e mort dal 1979. Ses gronds success ha el pudì festivar en ils onns 30. Finì sia carriera professiunala ha el gia l’onn 1942. Lasuenter era el trenader dals giuvens, tranter auter dal campiun olimpic Edy Reinalter. Sez na pudeva Rudolf Rominger betg partir ad ina olimpiada, da quel temp era quai in’occurrenza per amaturs.