Siglir tar il cuntegn
cuntegn

Mes vitg ed jau Buongiorno e Pfiat Enk!

Sta. Maria è sin il cunfin svizzer talian. Ma da Sta. Maria riv'ins en 2 Italias: A Bormio en l'Italia taliana ed en il Tirol dal sid en l'Italia tudestga.

Sta. Maria è datiers al cunfin talian. Vers ost arriv'ins en 5 minutas en il Tirol dal sid. Vers sid pon ins ir sur il pass dal Umbrail per arrivar en Vuclina a Bormio. Là discurr'ins talian.

Be durant la stad

Sisum il pass dal Umbrail è signalisada la colliaziun tranter Vuclina e Val Müstair. Ina colliaziun che funcziuna dentant be durant la stad. Durant l'enviern è il pass da l'Umbrail serrà.

Turas cun velo u ir en Muntogna

Il pass da l'Umbrail è sin 2503 meters sur mar. Sta. Maria è sin 1375 meters sur mar e Bormio è sin 1225 meters sur mar. E la via dal pass che collia las 2 vischnancas è spectaculara. Perquai n'è il contact tranter Sta. Maria e Bormio betg memia intensiv. Ils Buormins vegnan surtut en Val Müstair per far turas cun velo u en muntogna. U ch'els van sur il pass per arrivar en Svizra u en il Tirol dal sid.

Ils jauers van a Bormio per far ina excursiun en la pitschna citad da 4000 persunas, per ir a martgà u per far bogn en las termas da Bormio.

Betg pli sco pli bauld

Palma Giobbe Canclini è da Bormio ed ella faschess gugent vacanzas a Sta. Maria. Ella enconuscha era la Tessanda nua ch'ins po anc far l'emprendissadi da tessunza. Palma Giobbe di dentant era che oz n'è il contact tranter Bormio e Sta. Maria betg pli uschia intensiv co pli baud. Sco jauer èsi dentant bel dad arrivar en stgars in'ura en ina bella pitschna citad da l'Italia dal nord.

Palma Giobbe Canclini
Legenda: RTR/D. Spinnler
Oz n'è il contact tranter Bormio e Sta. Maria betg pli uschia intensiv co pli baud.
Autur: Palma Giobbe Canclinida Bormio

In mund veramain talian

Relaxant cura ch'ins vesa la planira da Bormio giusum il pass dal Umbrail. In auter mund da l'autra vart da la muntogna. Ins è tuttenina en in auter mund, en in mund veramain talian.

Sch'ins va puspè sin il pass dal Umbrail ed enavant sin il pass dal Stelvio, lura arriv'ins en la part tudestga da l'Italia, il Tirol dal sid. Quai ves'ins già sisum il pass cun cumprar la liongia tar Philipp Holzer che è da Stilfs giusum il Stelvio. El discurra tudestg sco tut la glieud en il Tirol dal sid.

Philipp Holzer tar ses stand da liongias.
Legenda: Sta. Maria e las 2 Italias Philipp Holzer da Stilfs venda liongias sin il pass dal Stelvio sin 2760 meters sur mar. RTR/D. Spinnler

Bun affar cun tut ils turists

El lavura sisum il pass durant la stad e fa in bun affar cun tut ils turists che arrivan cun töfs, autos e velos sin il pass spectacular. Vers il Tirol dal sid fa la via radund 50 stortas a piz enfin a Stilfs.

Ina regiun intensiva ed interessanta, la regiun trilingua tranter Sta. Maria, Vuclina e Tirol dal sid. En pauc temp pon ins dir: Buongiorno, Allegra e Pfiat Enk!