In vent frestg duai arrivar al seminari Son Gliezi ed a la Scola auta da teologia Cuira. L'uvestg Joseph Bonnemain ha nominà Daniel Krieg sco nov regens. Quel vegnia a cumenzar il prim d'october citescha l'agentura da novitads Kath.ch ord ina brev da l'uvestg als spirituals ed al persunal da l'uvestgieu.
Equiliber, madirezza e cumpetenza
Il seminari Son Gliezi e la Scola auta da teologia duain daventar lieus nua che dunnas ed umens vegnian furmads a persunalitads equilibradas, madiras e cumpetentas, scriva l'uvestg Bonnemain en sia brev. Ed i saja il dretg mument da far midadas tar la direcziun dal seminari Son Gliezi.
Il nov regens Daniel Krieg è 48 onns vegls e vegn dal chantun Sviz. Dapi il december passà è el canoni da l'uvestgieu da Cuira. Krieg suonda al regens da fin uss, Martin Rohrer, ch'è dapi 8 onns en uffizi.
