Siglir tar il cuntegn
Inhalt

«Scola Duin» «Mo il tic tac da l'ura»

Eligi Derungs ha accumpagnà cun sia cameran ils scolars ed il scolast da Duin durant in entir onn.

Legende: Video Scola Duin - trailer dal film abspielen. Laufzeit 00:43 Minuten.
Or da RTR dals 27.08.2015.

«Jau ma regord anc bain vi da l’onn 1967 viaden en l’atun, mes emprim di da scola a Vella en Lumnezia: Tut gnervus e cun in turnister da tgirom spetg jau avant chasa sin mes collegas Remo e Marco. Agitads e plain marveglias marschain nus vers la chasa da scola.

Arrivads en scola ha il scolast Foppa mussà a nus il plaz, giavischs per in plaz na devi betg. Nus, quai era l’emprima classa cun 14 uffants, 7 buobs e 7 mattatschas. La stanza da scola cun bancs da lain pli vegls era fullanada d’ina brajada d’uffants. En stanza eran nus passa 30 «gnagners» en trais classas.

Mintga singul scolar ha ses agen banc da scola, propi in auter mund che da mes temp!
Autur: Eligi Derungs

Ussa, prest 50 onns pli tard, carmala la stanza da scola puspè, betg a Vella, mabain a Duin. La scola da Duin è numnadamain la pli pitschna scola cumplessiva rumantscha, vul dir: ina stanza, in scolast, duas scolaras e sis scolars, quatter classas. Ina stanza charina cun bler plaz e cun in chantun da ruaus. Mintga singul scolar ha ses agen banc da scola, propi in auter mund che da mes temp!

Durant in entir onn da scola observ jau cun mia camera il far e demanar dals scolars e dal scolast da Duin. Jau sun in dad els e lasch reviver ils muments durant chant ed instrucziun, il di ch’els rimnan palpiri ed jau vom cun els sin viadi da scola. E lura -in mument tut spezial- sun jau era là cura che Tizian, Florian, Patric, Linda, Lorena, Livio, Josa, e Nico survegnan dal scolast Curdin Christoffel l’attestat.»

Eligi Derungs