Siglir tar il cuntegn

Header

video
Maissen (elegida), Bühler (elegì) e Hug (betg elegì) vegnan a pled
Or da Telesguard dals 15.05.2022.
abspielen. Laufzeit 5 minutas 2 Sekunden.
cuntegn

Regenza La PPS mancheta er cun Hug il sigl en la regenza

Era cun Roman Hug na dumogna la Partida populara betg il pass en la regenza. Remartgablamain bleras vuschs fa il candidat nov da la Partida liberaldemocratica Martin Bühler. Cun la candidata nova Carmelia Maissen da l’Allianza dal Center sesa era puspè ina dunna en la regenza. Ils cussegliers guvernativs en uffizi Marcus Caduff e Jon Domenic Parolini (omadus AdC), sco er il socialdemocrat Peter Peyer èn reelegids – il pli cler Marcus Caduff ch’ha survegnì las pli bleras vuschs. Hans Vetsch n'ha gì nagina schanza.

La participaziun a l’elecziun munta a 39,15%. La maioritad absoluta munta a 17'278 vuschs.

La nova regenza
Legenda: Ils resultats Marcus Caduff, Martin Bühler, Peter Peyer, Carmelia Maissen e Jon Domenic Parolini èn a partir dal 1. da schaner 2023 en la regenza grischuna. RTR

PPS vinavant betg en regenza

Roman Hug n’ha betg pudì recaltgar in sez per la Partida populara en la regenza grischuna. El ha fatg passa 6'100 vuschs pli pauc che Jon Domenic Parolini ch'è sin il tschintgavel plaz. Igl è gia la quarta giada che l’emprova da recaltgar in sez na gartegia betg a la Partida populara: Ils onns 2010 e 2014 aveva Heinz Brand candidà e l’onn 2018 il cumandant da la Polizia chantunala Walter Schlegel.

video
Roman Hug: «Persunalmain èsi ina trumpada»
Or da Actualitad video dals 15.05.2022.
abspielen. Laufzeit 1 minuta 11 Sekunden.

Martin Bühler sin segund plaz

La PLD po defender ses sez da Christian Rathgeb. Martin Bühler fa in resultat zunt remartgabel sin plazza dus, gist suenter Marcus Caduff (AdC) ch’ins ha spetgà a la testa. La differenza tranter l'emprim ed il segund munta a 1'349 vuschs.

video
Martin Bühler: «Uss sun jau obligà da prestar insatge»
Or da Actualitad video dals 15.05.2022.
abspielen. Laufzeit 1 minuta 18 Sekunden.

Maioritad per Allianza dal Center

Carmelia Maissen, Jon Domenic Parolini e Marcus Caduff.
Legenda: La nova cussegliera guvernativa Carmelia Maissen cun ils dus collegas da partida ch'èn vegnids reelegids, Jon Domenic Parolini e Marcus Caduff. RTR

Per l’Allianza dal Center ha la strategia cun in ticket da trais purtà fritg: Tant ils dus cussegliers guvernativs en uffizi, Marcus Caduff e Jon Domenic Parolini, sco era la candidata Carmelia Maissen èn elegids. Quai munta che l’Allianza dal Center ha ina maioritad en la regenza grischuna. En egl croda che Carmelia Maissen ha fatg passa 100 vuschs dapli ch'il cusseglier guvernativ en uffizi Jon Domenic Parolini.

Parolini cun resultat confortabel

Cuntrari a tut las retschertgas e speculaziuns èsi gartegià questa giada a Jon Domenic Parolini da vegnir elegì cun in resultat confortabel, malgrà ch’el è sin l’ultima plazza. Ses avantatg sin la PPS è questa giada dentant grond. Nus ans regurdain: Avant quatter onns aveva l’um da Scuol la finala fatg 31 vuschs dapli che Walter Schlegel (PPS), quai suenter ch'il chantun aveva anc ina giada dumbrà las vuschs.

Ils dus reelegids da l'Allianza dal Center

audio
Marcus Caduff: «Jau vi cuntinuar cun la lavur ch'jau hai cumenzà»
aus Actualitad vom 15.05.2022.
abspielen. Laufzeit 2 minutas 25 Sekunden.
audio
Jon Domenic Parolini: «Jau hai gì grond sustegn da la Rumantschia»
aus Actualitad vom 15.05.2022.
abspielen. Laufzeit 4 minutas 3 Sekunden.

Suveran grischun conferma persunas en uffizi

Avrir la box Serrar la box

Sco retschertgas da RTR mussan han Grischunas e Grischuns ils ultims 100 onns adina confermà cussegliers guvernativs en uffizi. L’ultim che n’è betg vegnì reelegì è stà Balthasar Anton Vieli l’onn 1908. N'avess il suveran grischun betg relegì Jon Domenic Parolini fiss quai pia stà ina surpraisa.

Carmelia Maissen – puspè ina dunna en regenza

Suenter ina perioda d'uffizi senza dunnas en la regenza è uss Carmelia Maissen vegnida elegida. Ella è pir la terza dunna en l'istorgia da la regenza grischuna. L'emprima è stada Eveline Widmer-Schlumpf (1999-2008) e sia successura Barbara Janom Steiner (2008-2018). Omaduas eran oriundamain en la PPS, han dentant midà tar la PBD suenter la separaziun da las duas partidas.

video
Carmelia Maissen: «Il resultat cler surprenda mai pelvair»
Or da Actualitad video dals 15.05.2022.
abspielen. Laufzeit 1 minuta 18 Sekunden.

Sco spetgà ha il socialdemocrat Peter Peyer recaltgà bleras vuschs en la chapitala da Cuira. La finala sa classescha el sco terz en la rangaziun. Il candidat senza partida Hans Vetsch n'ha gì nagina schanza.

audio
Peter Peyer: «Cun il terzmeglier resultat sun jau fitg cuntent»
aus Actualitad vom 15.05.2022.
abspielen. Laufzeit 3 minutas 34 Sekunden.
audio
Hans Vetsch: «Sch'jau fatsch vinavant politica na sai jau anc betg»
aus Actualitad vom 15.05.2022.
abspielen. Laufzeit 3 minutas 3 Sekunden.

Nua ha tgi survegnì quant sustegn? Sutvart pudais vus selectar in dals candidats u la candidata per vesair nua ch'els han fatg vuschs.

Funtauna elecziuns grischunas

Avrir la box Serrar la box

RTR sa basa sin las datas che la Chanzlia chantunala dal Grischun metta a disposiziun. Quellas èn da chattar qua.

RTR elecziuns

Artitgels legids il pli savens

Scrollar a sanestra Scrollar a dretga