Siglir tar il cuntegn

Header

video
Promo Femina: Dapli dunnas en la politica
Or da Telesguard dals 19.05.2022.
laschar ir. Durada: 3 minutas 9 Secundas.
cuntegn

Project «Promo Femina» Finamira: Dapli dunnas en gremis communals

En suprastanzas communalas en Svizra èn actualmain stgars in quart dunnas – en il Grischun èsi 21%. Cun il project «Promo Femina» mussa la Scola auta spezialisada dal Grischun 120 mesiras co augmentar questa cumpart.

I na dat naginas differenzas tranter citads e champagna – en l'entira Svizra èn las dunnas sutrepreschentadas en ils gremis communals. A questa conclusiun vegn Ruth Nieffer che maina il project a la Scola auta spezialisada dal Grischun (FHGR). La raschun na saja dentant nagina discriminaziun sistematica, mabain ch'i dettia memia paucas candidatas per uffizis.

Foto da Ruth Nieffer en ses biro
Legenda: Ruth Nieffer è dozenta a la Scola auta spezialisada dal Grischun e maina il project «Promo Femina». RTR, Carmen Monn

Qua ina curta survista da la situaziun en il Grischun (dapli graficas a la fin da l'artitgel):

Gremi Cumpart dunnas
Suprastanza communala 21%
Cumissiun da gestiun 29%
Cussegl da scola 57%
Parlament communal 22%

Cun 26 onns presidenta dal parlament

Gierina Gabriel è actualmain presidenta dal parlament da la vischnanca Ilanz/Glion. Cun 7 autras politicras e 17 politichers è la cumpart da dunnas qua plitost auta en congual cun autras vischnancas. A la dunna da 26 onns èsi impurtant da surpigliar responsabladad e da dar impuls tematics. La politicra liberaldemocratica ha studegià giurisprudenza a Berna e finì l’onn passà il master. Uss lavura ella en ina advocatura a Cuira e s’occupa speravi cun la politica.

video
Pertge che Gierina Gabriel fa politica
Or da Telesguard dals 19.05.2022.
laschar ir. Durada: 3 minutas 11 Secundas.

En media ina suprastanta en Engiadin’Ota

En las suprastanzas communalas da las vischnancas en l'Engiadin’Ota sesa en media ina dunna. Uschia era a Samedan. Tenor il president communal Gian Peter Niggli èn las dunnas bain represchentadas dapi 50 onns en la politica communala, la maioritad han però adina ils umens. In motiv pudess esser che la politica communala è pli persunala e las consequenzas da las decisiuns badan ins savens anc onns pli tard. Per motivar dapli dunnas da far politica ston tenor Gian Peter Niggli vegnir activas en prima lingia las partidas. Il pur e politicher liberaldemocratic è persvas che dapli dunnas en la politica communala fissan impurtantas per las discussiuns. Per las decisiuns finalas n’haja il gender però nagin’influenza.

Gian Peter Niggli, il president communal da Samedan
Legenda: Gian Peter Niggli beneventass dapli dunnas en la politica communala. RTR, Selina Planta

Motivar dunnas da s'engaschar

Per motivar dapli dunnas da surpigliar uffizis communals datti uss ina plattafurma online, cun 120 mesiras ed exempels pratics. Questas mesiras sa drizzan a vischnancas, partidas localas u ad organisaziuns da dunnas.

Las mesiras

Avrir la box Serrar la box

Resumà insaquants exempels dal catalog da 120 mesiras:

  • Far transparent la lavur per exempel cun dis da las portas avertas tar l'administraziun communala, sairas d'infurmaziun u la pussaivladad da far part a sesidas
  • Descriver il profil e las pretensiuns per l'uffizi per che las dunnas sappian dapli davart il pensum, responsabladad e temp ch'igl è d'impunder
  • Mussar biografias da dunnas che han cumenzà sco politicras communalas
  • Motivar persunas betg elegidas da puspè sa metter a disposiziun
  • Crear ina glista da check che mussa sch'ina dunna è adattada per in uffizi
  • Organisar lavuratoris da l'avegnir e discutar la rolla da las dunnas en la vischnanca
  • Metter a disposiziun in coach u in sistem da padrin/madritscha ed era garantir ina buna introducziun en l'uffizi
  • Porscher scolaziuns, curs pratics u barats aifer l'entir chantun
  • Schlargiar candidaturas era sin dunnas che na stattan betg en vischnanca u possessuras d'abitaziuns secundaras
  • Flexibilisar temp da lavur e da sesidas per exempel cun inscunters virtuals u sistem da substituziun
  • Garantir in'indemnisaziun adequata, per exempel era tenor uras

Co è la situaziun en mia vischnanca?

La cumpart da dunnas en suprastanzas communalas munta en il Grischun èn media a 21%, quella cifra variescha dentant da vischnanca a vischnanca, sco las graficas messas a disposiziun mussan.

In zic dapli dunnas fan actualmain part ad ina cumissiun da gestiun, en media grischuna 29%.

Tut in auter maletg tar ils cussegls da scola – là en las dunnas per part perfin en la maioritad cun 57%.

Las dunnas èn era sutrepreschentadas en quellas vischnancas che han parlaments communals (en media 22% dunnas).

Il studi da la FHGR

Avrir la box Serrar la box

La Scola auta spezialisada dal Grischun ha creà questas graficas cun agid da las autoritads chantunalas ed indicaziuns online da las vischnancas. Las cifras dateschan da la stad / atun 2021.

Per l'entir project collavura la FHGR cun ils biros d'egualitad dals chantuns Grischun, Appenzell Dador, Son Gagl, Vallais e Turitg e cun l'Uniun svizra da vischnancas. Plinavant han bun 100 politicras communalas, dunnas ed expertas discutà en lavuratoris las raschuns per la sutrepreschentaziun da dunnas en uffizis communals e svilupà mesiras.

Ord l'archiv

Gia il 1962 aveva il piunier da radio, Tista Murk, tematisà la relaziun «dunna e politica». Quai cun Selina Chönz, Gada Tenchio-Willi ed Eugenia Cadruvi. Gia l'entschatta da l'emissiun lascha sentir che la percepziun da la dunna era avant 60 onns anc dominada ferm dals umens.

audio
Discussiun davart la dunna e la politica
ord RTR Audio dals 04.05.2022.
laschar ir. Durada: 19 minutas 20 Secundas.

RTR actualitad 07:00

Artitgels legids il pli savens