Siglir tar il cuntegn
Inhalt

+3° T'imagina: Tuttenina èsi 3° pli chaud …

Tge, sche la temperatura en Svizra è trais grads pli auta? Tge consequenzas ha quai per natira, economia e noss stil da viver? Quai e dapli dumondas enturn la midada dal clima e sias consequenzas ha tematisà l'emprima saira tematica naziunala da la SRG SSR cun Andri Franziscus ed Annina Campell.

Legende: Video +3° | L'entira emissiun abspielen. Laufzeit 02:26 Minuten.
Or da Saira tematica +3° dals 29.11.2017.

A tut las dumondas enturn la midada dal clima e sias consequenzas sa deditgescha l'emprima saira tematica naziunala da la SRG SSR. Radiotelevisiun Svizra Rumantscha (RTR) ha preschentà ensemen cun ils moderaturs Andri Franziscus ed Annina Campell ils 29 da november 2017 a las 20.05 sin SRFinfo la saira tematica rumantscha «+3°».

glatscher che lieua
Legenda: Il glatscher da l'Aletsch da 23 kilometers lieua – El è sa reducì per radund 3 kilometers dapi il 1870. Reuters

Ficziun documentara «Ina stad da chalira»

En il center da l'emissiun stat la ficziun documentara «Ina stad da chalira» (tudestg «Gefährlicher Sommer»).

Ina famiglia en il chantun Vallais passenta ina stad da chaliras: La mamma è dumandada sco commembra dal cussegl communal, il bab lavura sut cundiziuns difficilas en l'ospital ed ils uffants sentan ils privels da la natira durant in champ da vacanzas.

Discutar ed approfundar

Questa ficziun documentara dal reschissur da Cuira Daniel von Aarburg vegn emessa en trais parts ed è la basa per ulteriuras contribuziuns e discussiuns. En il studio a Cuira èn tranter auter envidads sco giasts il climatolog Jan Sedlacek, il glaziolog Felix Keller e la gestiunaria dal WWF Grischun Anita Mazzetta.

barbara janom steiner e romana ganzoni en culissa
Legenda: La president da la regenza grischuna Barbara Janom Steiner (san.) e l'autura Romana Ganzoni èn stadas al puls da las medias socialas cun #plus3grads. RTR, Ursin Cadisch

Damain enviern, dapli stad

Las consequenzas dal stgaudament dal clima per il turissem èn centralas per la versiun rumantscha da la saira tematica. Annina Campell s'annunzia dal post extern sin il Crap Sogn Gion, ses giast è il visiunari da turissem Reto Gurtner.

En il studio sa confrunta il schef da Grischun Vacanzas, Martin Vincenz, cun las dumondas davart il futur dal turissem grischun.

En tut las quatter linguas naziunalas – per rumantsch sin SRFinfo

La saira tematica naziunala vegn emessa en tut las quatter linguas naziunalas. La ficziun documentara e las contribuziuns èn las medemas sin tut ils chanals.

Differents èn ils accents, la tscherna dals giasts e la lingua. Planisadas èn era colliaziuns tranter las regiuns linguisticas. La versiun rumantscha pon aspectaturas ed aspectaturs guardar sin SRFinfo.

RTR livestream 20:08