A la fin èsi stà sco cun blers projects da digitalisaziun, la protecziun da datas ha mess pals en las rodas als responsabels. Enstagl ch'il chantun po terminar quest project da pilot il 2023, sa retardescha uss tut per trais onns.
Ma davent da l'entschatta: L'uffizi dal servetsch social duai survegnir ina nova software per registrar ed administrar datas da persunas, quai per simplifitgar il barat da datas tranter las vischnancas, il chantun e la finala era la Confederaziun. Tut quellas datas duain esser accessiblas sin ina singula plattafurma, uschia che betg mintga singula instanza sto registrar ellas da nov. Per stgaffir quella software e la plattafurma, ha il chantun incumbensà ina firma privata, in'interpresa da software dal chantun Berna. Uschè lunsch tut en urden.
Tar il project da pilot, ch'è vegnì lantschà en las vischnancas da Seewis e Claustra èn dentant sa mussads problems tar la protecziun da datas. Concret, la vischnanca A pudeva guardar las datas da la vischnanca B e cuntrari e quai senza restricziuns. Bain ha l'interpresa incumbensada fatg propostas al chantun co schliar quest problem, per exempel cun differentas bancas da datas, quai n'ha dentant betg cuntentà il chantun e correspundeva tenor il cusseglier guvernativ Marcus Caduff er betg a las cundiziuns da submissiun ch'ins aveva fatg, uschia ch'ins ha stuì interrumper l'entir project.
Quai vul dentant er dir, anc ina giada instradar la procedura da submissiun davent da l'entschatta, actualisar il carnet da duairs e laschar prender posiziun las vischnancas. Sin fundament dal retard quinta il chantun cun ina realisaziun finala dal project il 2025. L'onn suenter duai il sistem alura esser en funcziun, senza problems tar la protecziun da datas.
Nagin donn finanzial, ubain tuttina ?
Per il chantun na datti, tenor il cusseglier guvernativ e manader dal departament d'economia e fatgs socials Marcus Caduff, nagin donn finanzial. Il Cussegl grond aveva relaschà in credit d'obligaziun dad in milliun francs al chantun per realisar il project. Da quest milliun hajan ins fin l'interrupziun gnanc duvrà la mesadad, las expensas ch'il chantun ha gì envers l'interpresa incumbensada sajan vegnidas pajadas enavos.
L'interpresa incumbensada ha pajà enavos al chantun ils daners ch'ella ha survegnì per il project.
Propi senza donn e cust na vegn il chantun dentant betg ord l'affera. L'entir project saja natiralmain vegnì accumpagnà dad emploiads dal chantun e la lavur da lez ed uschia er las pajas ch'il chantun ha pajà, en quest senn dettia bain expensas finanzialas per il chantun, conceda Marcus Caduff. Quellas uras da lavur na sajan però betg stadas per nagut. Il chantun possia uss profitar da l'experientscha ch'ils collavuraturs e las collavuraturas hajan fatg ed uschia stoppian ins betg entschaiver en dal tuttafatg da nulla.
Digitalisaziun en Svizra va pe zop
Che la digitalisaziun en Svizra ha anc potenzial n'è nagut nov, gist er tar las administraziuns communalas, chantunalas e federalas. Tenor in rapport da l'Uniun Europeica ch'è vegnì publitgà il 2020 sa chatta la Svizra sin plaz 29 da 36 pajais examinads.
Per far frunt a questa problematica han la Confederaziun e las regenzas chantunalas lantschà la «Administraziun digitala Svizra». Quella è en funcziun dapi l'entschatta da quest onn e duai promover la digitalisaziun svizra.
