Tgi ch'è scolà en la tgira e na lavura betg en il sectur ha dapi l'emna passada da s'annunziar tar il chantun. Quai ha la regenza grischuna decis en vista da la situaziun epidemiologica e la situaziun en ils ospitals. La critica sin questa decisiun è vegnida svelt. Enstagl da reagir e prender mesiras, sforzia il chantun annunzias da persunas ch'han gia bandunà la tgira, hai per exempel gì num en las raits socialas. Ina critica ch'il minister da sanadad dal chantun na lascha betg valair.
Nus avain gia mesiras rigurusas, l'obligatori d'annunzia è qua ina mesira fitg moderada.
En pli èsi simplamain ina giada ina dumonda per s'annunziar. Quai na veglia dentant betg dir che las persunas vegnian lura era en acziun. Il chantun veglia reagir profilactic e proactiv. Plinavant, saja la discussiun in zic obsolet – Il chantun ha la basa legala per quest'opziun e fa uss diever dad ella.
Nagin register, nagina survista
Ma daco dovri quest appel? Il chantun ha numnadamain gia fatg in l'onn passà. Qua datti dus motivs, sco Peter Peyer ha declerà. Per l'ina ha il chantun stuì stizzar las datas da l'onn passà – Quai pervia da la protecziun da datas. L'auter motiv è la survista: Il chantun n'ha nagin register cun persunas bain scoladas en la tgira, che na lavuran betg pli en il sectur. Uschiglio na fiss quest appel gnanc stà necessari. In register general per il futur pudess esser ina schliaziun, ha agiuntà il minister da sanadad. Quai sajan dentant discussiuns per pli tard.
Sche nus avessan savì tut a l'entschatta, avessan nus anc fatg bler auter.
La pandemia n'è anc betg a fin
Il focus è uss, da vegnir uschè bain sco pussaivel atras la pandemia. Er sch'i po forsa parair, sco sche la situaziun actuala è be mez uschè nauscha sco spetgà, na dastgian ins betg emblidar, che la pandemia n'è anc betg passada, ha accentuà Peter Peyer. Mumentan dumbra la Svizra numnadamain cifras da record e las consequenzas na possian ins anc betg valitar.
In zic optimistic è il minister da sanadad dentant bain: I fetschia almain en il mument la parita, ch'ils menders scenaris na sa cumprovian betg. En consequenza na stoppian ins uschia er betg far diever da la glista d'annunzias.
