Siglir tar il cuntegn
Inhalt

Parc Adula Votaziun Parc Adula – venderdi u dumengia

Ils 27 da november 2016 è il di che la gronda part da las 17 vischnancas decidan davart il Parc Adula. Ina part da las vischnancas decida dentant gia il venderdi, ils 25 da november.

Mussavia sin il pass Soreda en la zona da coc planisada dal Parc Adula.
Legenda: Mussavia sin il Pass Soreda en la zona da coc planisada dal Parc Adula. Keystone

En nov da las 17 vischnancas che han da decider davart il Parc Adula vegn la votaziun fatga a l’urna e quai dumengia, ils 27 da november. Las ulteriuras otg vischnancas na decidan betg a l’urna mabain ad ina radunanza communala, las qualas han normalmain lieu il venderdis, pia gia ils 25 da november.

Legenda: Cura e co croda la decisiun davart il Parc Adula RTR

Votar venderdi, communitgar dumengia

Sulettamain la vischnanca Rossa entadim la Val Calanca ha decidì da spustar la radunanza communala sin dumengia, ils 27 da november. Las autras set vischnancas han planisà da manar tras la radunanza communala il venderdi.

La communicaziun dals resultats vegn dentant fatga a moda differenta. En intginas vischnancas vegn la suprastanza a proponer ina votaziun a l’urna e lura dumbrar las vuschs pir la dumengia.

Autras vegnan a far la votaziun a maun liber sco usità, dentant pir communitgar publicamain il resultat la dumengia. Sulet Val vegn a midar nagut vid la communicaziun e publitgar ils resultats gist suenter la radunanza communala.

Giavisch dal Parc Adula

Il directur dal project Parc Adula, Martin Hilfiker, ha confermà a RTR che quai saja stà in giavisch dal Parc Adula ch’ils resultats da las votaziuns dal venderdi vegnian pir communitgads la dumengia. Quai per na betg influenzar las votaziuns da la dumengia.

Co e cura ch’i vegn votà e cura ch’ils resultats vegnan communitgads decidan la finala tuttina las vischnancas. Ellas pon resguardar il giavisch dal Parc Adula, intginas han fatga quai, na ston dentant betg. Ed era Martin Hilfiker è conscient ch'il giavisch na vegnia probablamain betg resguardà dapertut. Sche resultats da las votaziuns dal venderdi vegnian publitgads avant dumengia, na saja quai betg tragic ed era betg in problem.

RR actualitad 12:00